1 saylı Bakı İnzibati-İqtisad Məhkəməsində Müsavat Partiyasının Bakı Şəhər İcra Hakimiyyətinə (BŞİH) qarşı qaldırdığı sərbəst toplaşma azadlığının pozulmasına dair iddia ərizəsinə baxılıb.
Müsavat Partiyasından APA-ya verilən məlumata görə, məhkəmə iddianı təmin etməyib.
Müsavat Partiyası qərardan apelyasiya şikayəti veriləcəyini, son nəticədə Avropa Məhkəməsinə müraciət olunacağını bildirib.
Qeyd edək ki, Müsavat Partiyası bu il aprelin 19-da “20 Yanvar” metro stansiyasından keçmiş “Məhsul” stadionuna yürüş keçirməklə bağlı BŞİH-ə müraciət edib. BŞİH avtomobillərin hərəkətinə və insanların gediş-gəlişinə mane ola biləcəyini əsas götürərək Müsavat Partiyasının yürüş keçirməsini məqsədəuyğun hesab etməyib, aprelin 19-da “Məhsul” stadionunda mitinq keçirməklə bağlı müraciət edilərsə, bu müraciətə baxıla biləcəyini açıqlayıb. Müsavat Partiyası isə bunun razılaşmayaraq məhkəməyə müraciət edib.
Qaynar.info
