REAL Hərəkatının İdarə Heyətinin üzvü Natiq Cəfərli hakimiyyət və müxalifət münasibətləri ilə bağlı yazı ilə çıxış edib.
Qaynar.info xəbər verir ki, N. Cəfərli yazısında qeyd edib ki, konstruktiv müxalifət olmur, normal ölkələrdə iqtidar partiyasının müəyyən lazımlı, lüzumlu, xalqa və dövlətə xeyirli olan təkliflərinə konstruktiv yanaşaraq, onların qəbuluna mane olmamaq praktikası var. Belə bir sistem olmayanda, məsələn, bizdə, hakimiyyətin “kukla müxalifəti” olur ki, onları da parlamentə buraxırlar, xaricə göstərib, bizdə çoxpartiyalılığın olmasını, güya, sübut edirlər.
Ölkədə müxaliflik anlayışı illərdir devalvasiyaya uğradılıb (hər iki tərəfdən), amma yeni nəsil artıq yetişib, ona görə də, ölkədə müxalif insanları, təşkilatları iki qrupa ayırmaq olar: 1) İllərdir hakimiyyətlə müəyyən separat danışıqları, razılaşmaları, içli-dışlı əlaqələri olanlar, 2) Yeni, gənc, hakimiyyətlə heç vaxt heç bir gizli anlaşmalarda iştirak etməyən, amma, müəyyən açıq-aşkar, bağlı qapılar arxasında deyil də, cəmiyyət qarşısında diskussiyalara açıq olan qüvvələr. Bir sözlə, məncə, qeyri-real, və real müxalifət bölgüsü daha doğrudur...
Natiq Cəfərlinin “kukla müxalifəti”, "Parlamentə buraxılan müxalifət" deyəndə kimi nəzərdə tutur? Yazıda bu məsələ aydınlaşmadığı üçün bəzi parlamentdə təmsil olunan partiya liderləri ilə əlaqə saxladıq.
Ümid Partiyasının sədri, millət vəkili İqbal Ağazadə Qaynar.info-ya açıqlamasında hesab edir ki, Natiq Cəfərli onun rəhbərlik etdiyi partiyanı nəzərdə tutmur: "Natıq bəyin özündən soruşun. Konkret "Ümid" Partiyasının nəzərdə tutursa, məsələyə münasibət bildirim".
N. Cəfərli
Qaynar.info-ya açıqlamasında bildirib ki, o, bu yazısında ümumi durumu nəzərdə tutur. Konkret partiyalara gəlincə isə N. Cəfərli bunları deyib: "Ana Vətən Partiyasını, Sabir Rüstəmxanlının partiyasını götürək elə. Hərəsinin səhv etmirəmsə, parlamentdə 2 deputatı var. Ancaq varlıqları hiss olunmur heç. Heç bəzilərinin adını belə bilmirik. Bunlar müxalifət görüntüsü yaratmaq üçün parlamentə buraxılan insanlardı. Hakimiyyət də bundan çox gözəl istifadə edir. Söhbət İqbal bəydən getmir. Əksinə, İqbal bəy parlamentdə çox nadir şəxslərdəndir ki, heç olmasa arada çox ciddi və kəskin çıxışlar edir".
"Sizcə İqbal Ağazadə parlamentə buraxılıb, ya özü seçilib?" sualına cavabında N. Cəfərli bildirib ki, İqbal bəyin özü ilə də bu barədə danışıb: "İqbal bəyin seçildiyi dairədə çox böyük nüfuzu var. İqbal Ağazadə ordan böyük səs toplayıb. Amma İqbal bəy özü də danışanda etiraf edib ki, hakimiyyətin onayı olmadan parlamentə düşə bilməzdi. Yəqin ki, parlamentdə heç olmasa bir müxalif düşüncəli insanın olmasını istəyirdilər ki, onu parlamentə buraxıblar".
"Sizcə bunu istəməyinin səbəbi parlamentdə görüntü yaratmaqdır ya hansısa əlaqələrdən söhbət gedə bilər?" Sualına isə N. Cəfərlinin cavabı belə olub: "Yəqin ki, digərləri kimi olmasa da, yəqin, İqbal bəylə də hakimiyyət normal münasibətlər qurub. İqbal bəy artıq uzun müddətdir deputatdır. Azərbaycanda seçki sistemi yoxdur deyiriksə, ora düşən hər bir insanın parlamentə düşməyini şübhə altına almağa bizim haqqımız var".
Natiq Cəfərlinin ittihamında adı keçən Ana Vətən Partiyasının sədri Fəzail Ağamalı və Vətəndaş Həmrəyliyi Partiyasının sədri Sabir Rüstəmxanlı ilə əlaqə saxlamağa çalışsaq da, zənglərimiz cavabsız qaldı.
Pərviz Əzimov
Qaynar.info
