"Milli Məclisin sentyabrın 30-da keçiriləcək açılış sessiyasında elektron media ilə bağlı qanun layihəsi müzakirəyə çıxarılacaq"
Bunu Aktual.az-a açıqlamasında Milli Məclisin Təhlükəsizlik və müdafiə komitəsinin üzvü Siyavuş Novruzov deyib.
Onun sözlərinə görə, hər bir deputatın qanunvericilik təşəbbüsü ilə çıxış eləmək hüququ var: "Onu da bildirim ki, qanun layihəsi Milli Məclisə təqdim olunmamışdan əvvəl parlamentin müvafiq komitələrində müzakirəyə çıxarılacaq".
Siyavuş Novruzov hesab edir ki, istər saytlarda, istərsə də sosial şəbəkələrdə istifadəçinin şəxsiyyət vəsiqəsinin seriya nömrəsini daxil etdikdən sonra şərh yazması, sırf Azərbaycanın hərbi təhlükəsizliyi ilə bağlı görülən tədbir olacaq: "Biz burada sırf anonim informasiya verənlərə qarşı mübarizə üsulu seçmişik. Çünki anonim adla sosial şəbəkədən yararlanan insanın kim olduğunu müəyyən etmək olmur. Yəni şəxsiyyət vəsiqəsinin seriyası ilə sosial şəbəkəyə daxil olub, ordu haqqında gedən materiala normal fikir bildirən və hətta tənqid edən insana müdaxilə olmayacaq. Biz saxta adla sosial şəbəkədən istifadə edib, insanların narahatlığına səbəb olan təxribat xarakterli şərhlər yazan insanların qarşısını alacağıq".
Xatırladaq ki, millət vəkili bir müddət əvvəl Qafqazinfo-ya deyib ki, elektron media ilə bağlı xüsusi tədbirlər görüləcək: “Elektron media ilə bağlı müzakirə olunan bir neçə məsələ var. İstər saytlarda, istərsə də sosial şəbəkələrdə istənilən istifadəçi öncədən şəxsiyyət vəsiqəsinin seriya nömrəsin daxil edib sonra şərh yaza biləcək. Xarici ölkələrdə bu təcrübə var. Bu gün saytlarda nə qədər söyüşlər, təhqirlər var. Hamısı da müxtəlif saxta adlarladır. Bu, həm digər oxucuların etiket qaydalarının pozulmasına gətirib çıxarır. Bəzən də şəxslər buna görə müsahibə verməkdən imtina edirlər".
Qaynar.info
