Xəbər verdiyimiz kimi, bu gün Azərbaycanın Səudiyyə Ərəbistanında yeni səfiri təyin olunub.
Prezident İlham Əliyevin sərəncamı ilə səfir postuna Şahin Şakir oğlu Abdullayev təyinat alıb.
AzVision.az-ın məlumatına görə, Ş.Abdullayev 1959-cu ilin 14 noyabr tarixində anadan olub. Azərbaycan Dövlət Universitetini bitirib.
Ş.Abdullayev indiyədək müxtəlif vəzifələrdə çalışıb. O, 1981-84-cü illərdə Yəməndə səfirlikdə işləyib. Daha sonra Azərbaycanın Xarici İşlər Nazirliyində ikinci katib, birinci katib, katibliyin müdiri (1989-95), Azərbaycanın Misir Ərəb Respublikasındakı səfirliyinin müşaviri (1995-99), XİN Asiya idarəsinin rəisi (1999-2004), Azərbaycanın Küveyt dövlətində səfiri (2004-10) vəzifələrini tutub.
Təcrübəli diplomat 2010-cu ildə Azərbaycanın Misir Ərəb Respublikasında, Əlcəzairdə, 2011-cu ildən isə Sudanda fövqəladə və səlahiyyətli səfiri, həmçinin Azərbaycan Respublikasının Ərəb Dövlətləri Liqası yanında nümayəndəsi, Afrika İttifaqı yanında müşahidəçi statusunda nümayəndəsi olub.
