Çox işləmək, bacarıqları inkişaf etdirmək və yeni imkanlar axtarmaq mümkündür, lakin buna baxmayaraq, gəlirin artdığı hiss olunmaya bilər. Bəzən bunun səbəbi əmək bazarı və ya peşəkar bacarıqlar deyil, yorğunluq, narahatlıq və gündəlik gərginliklə mübarizə apararkən formalaşan vərdişlərdir.
Qaynarinfo xəbər verir ki, bu barədə gazeta.ru-ya qadın mentor və psixoloq Karina Kats məlumat verib.
Birinci vərdiş yorğunluğu alış-verişlə kompensasiya etməkdir. Xərcləmək nəyəsə sahib olmaq istəyindən çıxaraq rahatlıq, nəzarət və ya özünə qayğı hissini tez bir zamanda əldə etməyin üsuluna çevrilir.
“Biz əşyanın özünü deyil, özümüzü bir qədər yaxşı hiss etmək duyğusunu alırıq. Lakin zaman keçdikcə yorğunluq geri qayıdır, pul isə xərclənmiş olur”, deyə Kats bildirib.
İkinci vərdiş tükənmiş vəziyyətdə mühüm qərarlar qəbul etməkdir. Həddindən artıq yorulmuş psixika ən yaxşı variantı deyil, gərginliyi daha tez azaldan və insanda müvəqqəti dayaq hissi yaradan seçimi üstün tutur. Buna görə də əməkhaqqı və ya xidmət haqqı ilə bağlı danışıqları, yaxud iş yerini dəyişmək qərarını ağır iş həftəsinin sonuna saxlamaq məsləhət görülmür.
Bununla yanaşı, özünə vaxt ayırmaq, ən azı ayda bir dəfə sakitlik içində bir gün keçirmək də vacibdir. Bu, artıq düşüncələrdən uzaqlaşmağa və daha səmərəli işləməyə kömək edir.
Üçüncü vərdiş maliyyə ehtiyatı yaratmamaqdır. Pul ehtiyatı olmadan yaşamaq daimi narahatlığı gücləndirir. Bu zaman istənilən gözlənilməz hadisə böhran kimi qəbul edilir və insanı tələsik qərarlar verməyə vadar edir.
“Ehtiyat olmadıqda insan gəlirini necə artırmaq barədə deyil, yaranmış maliyyə boşluğunu necə doldurmaq barədə düşünür”, deyə ekspert vurğulayıb.
Dördüncü vərdiş yalnız gərginlik və əziyyət hesabına pul qazanmaqdır. Əgər insan uşaqlıqdan pulu ağır zəhmətlə əlaqələndirirsə, gəliri artırmağın daha rahat yolları ona etibarsız və ya layiq olmadığı qazanc kimi görünə bilər.
“Belə insanlara elə gəlir ki, əziyyət çəkib tükənmədən pul qazanmaq əsl qazanc deyil”, deyə Kats izah edib.
Beşinci vərdiş asanlıqla yerinə yetirilən işlərin dəyərini azaltmaqdır. İnsan özünün yaxşı bacardığı işləri adi hesab edir və başqalarının məhz bu bacarıqlara görə ona pul ödəməyə hazır olduğunu görmür. Ekspertin sözlərinə görə, gəliri artırmağın ən qısa yollarından biri çox vaxt məhz burada gizlənir.
Beləliklə, daha çox qazanmağa təkcə bacarıqların çatışmazlığı deyil, zərərsiz görünən, lakin dəyişdirilməsi mümkün olan vərdişlər də mane olur.
Problemin həlli üçün beş mərhələdən ibarət yanaşmadan istifadə etmək olar: özünü dərk etmək, artıq olanları aradan qaldırmaq, aydınlıq və diqqət mərkəzi formalaşdırmaq, planlaşdırma aparmaq və yeni sistemləri gündəlik həyata daxil edərək möhkəmləndirmək.
Bu yanaşma insanın daim təcili problemləri həll etmək rejimindən çıxaraq qərarların daha sistemli şəkildə qəbul edilməsinə keçməsinə kömək edir.
Aydın
