Zəminə Dünyamalıyeva: “Milli Şuranın vahid namizədi kimi Rüstəm İbrahimbəyovun namizədliyi irəli sürüləndə İsa Qəmbər əmmanı qoydu”“Milli Şuranın daxilində çəkişmə oldu-olmadı, qurum seçkilərdə uğur qazanmayacaq. Birincisi, Milli Şuranın seçki hazırlığı qaneedici deyil, ikincisi də, bir qurumda ki olanların ağızbirliyi yoxdursa, kim zəmanət verə bilər, bu kampaniyanı normal qaydada, şərəflə, ləyaqətlə başa çıxaracaq?!”.
Bunu Qaynar.info-ya Açıq Cəmiyyət Partiyasının (ACP) ali məclisinin sədri, Milli Şuranın üzvü Zəminə Dünyamalıyeva son dövrlər Milli Şurada baş verənlərdən danışarkən deyib.
ACP funksioneri qeyd edib ki, Milli Şurada toplananlara xalqın münasibəti sıfır dərəcədədir: “Bu baxımdan Milli Şuranın seçkidə uğur qazanması qeyri-mümkündür. Milli Şuranın ilkin yaranışında ortaya qoyulan layihə başqa cür idi. Heç kəs bilmirdi ki, Milli Şura yaranandan sonra İsa Qəmbərin və başqalarının necə münasibəti olacaq. Ona görə də hər kəs Milli Şurada demokratik qüvvələrin bir araya gəlməsinin tərəfində oldu. Hətta biz təşəbbüskar da olduq. Amma sonradan müəyyən məsələlər ortaya çıxdı. İlkin olaraq, Milli Şuranın vahid namizədi kimi Rüstəm İbrahimbəyovun namizədliyi irəli sürüləndə İsa Qəmbər əmmanı qoydu. Dedi ki, Müsavat Partiyasının namizədi var, Rüstəm bəy gəlməsə, namizədliyini irəli sürəcək. Bunu dəfələrlə sessiyalarda, mətbuatda dedi. Bilirsiz, siyasət elə bir şeydir ki, deyilən sözlərlə, fikirlərlə formalaşır. Bu cür kampaniyanın getməsi adamlar arasında şübhə toxumu səpdi”.
Z.Dünyamalıyeva Milli Şura sədri Rüstəm İbrahimbəyovun vahid namizəd məsələsində səhvə yol verdiyini bildirib: “Rüstəm bəyin səhvi ondan ibarətdir ki, özü bilirdisə, ikili vətəndaşlığı var, gərək o addımı atmayaydı. Əvvəlcədən deyəydi ki, ikili vətəndaşlığı var”.
ACP ali məclisinin sədri eks-spiker Rəsul Quliyevin Milli Şura ilə bağlı dediklərini də şərh edib: “Milli Şurada hərə öz məqsədini güddü. Rəsul Quliyev öz məqsədini güdən adam olmayıb. Ümumi işin xeyrinə o, istədi ki, demokratik qüvvələr bir arada olsun. Siyasətçi bu günü deyil, sabahı düşünür. Yəni bu gün Rəsul müəllim görür ki, burada uğur yoxdur, o, necə yalandan desin ki, var. Görünən kəndə nə bələdçi?! Ağlı başında olan adam hər kəs düşünər ki, seçkiyə gedən namizədlərdən, təbii ki, İlham Əliyev öndədir. Hakimiyyətin gücünü, bir az da saxtalaşdırmağı nəzərə alsaq, deyə bilərik ki, İlham Əliyev 70-80% səs toplayacaq”.
Z.Dünyamalıyeva Milli Şuraya daxil olmayan bəzi siyasətçilərin qurumda hakimiyyətə işləyənlərin olmasını demələrinə də münasibət bildirib: “Hakimiyyətin adamı” ifadəsi ən çox dəbdə olan sözdür. Müxalifətdə bu qədər hakimiyyətin adamı varsa, onlar da elə hakimiyyət deməkdir. Ona görə bu, mənbəyi olmayan fikirdir. Həmin adamlar Milli Şuraya qoşula bilməyiblər, Əli aşından da olublar, Vəli aşından da. Çünki Milli Şurada olanlar istədiklərini qazanıblar. Təbii ki, burada üzdə olan siyasətçiləri nəzərdə tuturam. O birilər nə hakimiyyətə, nə də Milli Şuraya yaxın düşə bildi. Təəssüflər olsun ki, bu gün nə milləti, nə də dövləti düşünən var. Hər kəsin öz marağı var. Hər nə desən deyirlər ki, 5 manat pul qazansınlar”.
İlkin
Qaynar.info 
