Tramp qıcıqlanır və Putinə səbrinin tükəndiyi barədə siqnallar göndərir - The Telegraph

Qaynarinfo xəbər verir ki, bu barədə "The Telegraph” mənbələrə istinadən yazır.

Nəşrin həmsöhbətlərinin sözlərinə görə, Rusiya bayrağı altında üzən neft tankerinin ələ keçirilməsi və yeni sanksiyalar haqqında qanun layihəsinin dəstəklənməsi — Putinə müharibəni dayandırmaq üçün vaxtın bitdiyinə dair siqnallardır.

"O (Tramp - red.) qamçı və kökə prinsipi ilə hərəkət edir. Və mən hesab edirəm ki, onun artıq heç bir kökəsi qalmayıb", - ABŞ prezidentinin yaxın ətrafına yaxın olan mənbə bildirib.

Digər bir mənbə əlavə edib ki, Rusiyanın "iki addım irəli - bir addım geri" danışıqlar taktikası Trampı getdikcə daha çox qıcıqlandırır.

"Rusiyalıların "iki addım irəli - bir addım geri” taktikasından istifadə etməsi administrasiyanı yorur: elə görünür ki, onlar razılaşmalara hazırdırlar, lakin sonra, ümid etdiyimiz suallar ortaya çıxdıqda, ya vəziyyəti gərginləşdirirlər, ya da ümumiyyətlə danışıqları dayandırırlar", - ABŞ rəsmilərindən biri izah edib.

Bir neçə hazırkı və keçmiş amerikalı rəsmi jurnalistlərə bildiriblər ki, Tramp administrasiyasının mövqeyi getdikcə Avropanın mövqeyi ilə yaxınlaşır: belə ki, Putin sadəcə vaxt qazanmağa çalışır.

Bunu britaniyalı bir rəsmi də təsdiqləyib. Onun sözlərinə görə, Rusiya Federasiyasının Ukraynaya qarşı davamlı hücumları Tramp administrasiyasının baxışlarının hazırda münaqişəyə dair Avropa baxışına əvvəlkindən daha yaxın olmasına gətirib çıxarıb.

"Putinin daimi qəddarlığı, məkrli davranışı və manipulyasiyaları administrasiya tərəfindən diqqətdən kənarda qalmır", - o qeyd edib.

Daha əvvəl xəbər verdiyimiz kimi, ötən gün Tramp həm Putinin, həm də Zelenskinin hazırda sülh sazişi bağlamaq istədiyini bəyan edib. Onun sözlərinə görə, hər iki tərəfin mövqeyi səbəbindən danışıqlar prosesi dəfələrlə dalana dirənib. Eyni zamanda, Amerika lideri hesab edir ki, hər iki tərəf razılığa gəlməkdə maraqlı ola bilər. Bununla belə, o, əvvəlki təcrübəsindən — sülh üçün açıq şəkildə müəyyən etdiyi "dedlayn"lardan (son müddətlərdən) uzaqlaşaraq, müharibənin mümkün başaçatma müddəti barədə hər hansı tarix göstərməkdən imtina edib.

Həmçinin Tramp əmin edib ki, sülh sazişi əldə olunarsa, Rusiya Federasiyası Ukraynaya yenidən hücum etməyəcək. O, həmçinin ABŞ-ın Ukraynanın gələcək müdafiəsində iştirakı ilə bağlı öhdəliklər götürməyə hazır olduğunu ifadə edib. "Mən tam əminəm ki, onlar yenidən işğala başlamayacaqlar, əks halda mən buna razı olmazdım", - Ağ Ev rəhbəri bildirib.