"Ermənilər Dağlıq
Qarabağda qalacaqsa və onlara belə bir koridor veriləcəksə, paralel olaraq Zəngəzurdan qovulan azərbaycanlılar
bunun müqabilində Zəngəzura dönməlidirlər”.
Bunu Qaynarinfo-ya
açıqlamasında politoloq Azər Qasımlı Türkiyə Prezidenti Rəcəb Tayyib Ərdoğanın
rusiyalı həmkarı Vladimir Putinlə telefon danışıqları zamanı Qarabağ
probleminin həlli üçün işçi qrupu yaradılması ilə bağlı təklifini şərh edərkən
deyib. Politoloq təklif edib ki, belə bir şəraitdə bölgədə heç bir sülhməramlılar
olmamalıdır:
"1920-ci ildə XI
Qızıl Ordu Azərbaycanı işğal etdi. Üzərindən 100 il keçəndən sonra, noyabrın
8-də Azərbaycan Şuşanı işğaldan azad etdi. Şuşanın işğaldan azad edilməsi nə
deməkdir? Şuşa bizim üçün təkcə tariximiz, mədəniyyətimiz demək deyil. Şuşanın
önəmi hərbi baxımdan Qarabağ müharibəsinin aqibətini həll edəcək şəhər
olmasında da deyil. Şuşanın işğaldan azad edilməsi ilk növbədə bizim əl-qolumuzu
bağlayan, danışıqlar formatlarına "5+2”-lərin, "status- kvo”ların silinməsi deməkdir.
İndiki durumda müharibəni saxlamaq, yenidən köhnə formatlarla danışıqlar
masasını təşkil etmək və öz sülhməramlılarını bölgədə yerləşdirmək Rusiyanın
maraqlarına uyğundur. Təbii ki, Türkiyə və Azərbaycanın maraqlarına uyğun
deyil. Rusiyanın yanında bunu erməni tərəfi də istəyir. Lakin Ermənistan rəhbərliyi
torpaqlardan çıxacaqlarına və bununla bağlı hər hansı cədvəl verəcəklərinə dair
atəşkəs sazişi imzalaya da bilmir”.
Azər Qasımlınin
fikrincə, Paşinyan belə bir sənədə imza atsa, hakimiyyətini itirəcək:
"Yaxud da o, tarixə
satqın kimi düşə bilər. Hər bir halda düşünürəm ki, bu günlərdə Paşinyana qarşı
təziqlər başlayacaq. Həm Rusiyadan, həm
də Rusiyanın Ermənistan siyasətində olan 5-ci kalon tərəfindən də bu təzyiqlər
artacaq”.
Politoloq qeyd edib
ki, Qarabağda hər hansı ölkənin sülhməramlı qüvvələri olmamalıdır:
"Paşinyan bizim şərtlərlə
masaya oturmaq, sənədlərə imza atmaq istəməsə, ordu durmamalı, ilk növbədə Xankənd,
Xocalı, Xocavənd, sonra isə Laçın və Kəlbəcəri işğaldan azad etməlidir. Bu məsələdə
sona kimi getməli və hərb meydanında bütün formatları darmadağın etməliyik.
Yalnız bundan sonra hər hansı danışıqlar başlaya bilər. Ondan sonra Ermənistan
tərəfi istəyər imza atsın, istəyir atmasın. Yenidən Türkiyə və Rusiya
formatında hər hansı danışıqlar ola bilər. Bu danışıqların əsas məğzi heç bir
halda sülhməramlıların yerləşdirilməsi olmamalıdır. Onun məğzi əgər
qalacaqlarsa, Qarabağla Ermənistan arasında təhlükəsiz bir koridorun olmasıdır.
Ki, onlar Ermənistana təhlükəsiz şəkildə gedib-gələ bilsin”.
Azər Qasımlının
fikrincə, Dağlıq Qarabağda ermənilər qalacaqsa və onlara belə bir koridor veriləcəksə,
paralel olaraq Zəngəzurdan qovulan azərbaycanlılar bunun müqabilində Zəngəzura
dönməlidirlər:
"Yenidən onlar
ata-baba yurdlarında yerləşdirilməlidirlər. Bunun yanında onların da təhlükəsizliyini
qoruyacaq hansısa bir format və Azərbaycanla Naxcıvan arasında koridor
olmalıdır. Əgər Laçın koridorunu istəyirlərsə, biz də Naxçıvandan koridoru istəyirik.
Ermənilər Qarabağda qalmaq istəyirsə, biz də Zəngəzurdan qovulan azərbaycanlıları
orada yerləşdirməliyik. Və bölgədə də heç bir sülhməramlılar olmamalıdır. Sadəcə,
Türkiyə ilə Rusiya bu məsələdə qarant ölkə kimi çıxış edə bilərlər. Ümid edirəm
ki, Azərbaycan iqtidarı da bu yöndə addımlar atacaq”.
Qeyd edək ki, Türkiyə
Prezidenti Rəcəb Tayyib Ərdoğan rusiyalı həmkarı Vladimir Putinlə telefon
danışıqları zamanı Qarabağ probleminin həlli üçün yeni işçi qrupu yaradılmasını
təklif edib.
Bahar Rüstəmli
