“Azərbaycan Amerika Alyansının ABŞ-da təşkil etdiyi qala-ziyafətdə ABŞ Dövlət Departamentinin nümayəndələri də iştirak ediblər”.
Bunu virtualaz.org saytına ABŞ-ın Azərbaycandakı səfriliyinin mətbuat xidmətindən bildiriblər. Amerikanın diplomatik idarəsi Azərbaycan Amerika Alyansının bu gün yaydığı bəyanatı şərh edərkən belə deyib.
Xatırladaq ki, nəqliyyat naziri Ziya Məmmədovun oğlu Anar Məmmədovun başçılıq etdiyi Azərbaycan Amerika Alyansı bu gün xüsusi press-relizlə çıxış edib. Qurum həmin sənəddə təəssüf hissi ilə vurğulayıb ki, Dövlət Departamentinin nümayəndələri Azərbaycan Amerika Alyansının Vaşinqtonda 600 nəfərin iştirakı ilə keçirdiyi qala-ziyafətə dəvət olunsalar da bu qurumdan heç kim tədbirdə iştirak etməyib.
Göründüyü kimi, ABŞ səfirliyi məhz bu press-relizdəki informasiyanı təkzib edir.
***
Azərbaycan Amerika Alyansının prezidenti Anar Məmmədovun Vaşinqtonda təşkil etdiyi ziyafətdə Dövlət Departamentindən heç kim iştirak etməyib.
Virtualaz.org saytı A.Məmmədovun ABŞ-da təşkil etdiyi lobbi təşkilatı Azərbaycan Amerika Alyansı tərəfindən yayılmış press-relizə əsasən xəbər verir ki, 600-a yaxın adamın qatıldığı qonaqlıqda iştirak edənlər arasında Dövlət Departamentindən heç kimin adı yoxdur. Baxmayaraq ki, Azərbaycan Amerika Alyansının ötən il təşkil etdiyi birinci qala-ziyafətdə dövlət katibinin köməkçisi Erik Rubin iştirak və çıxış etmişdi.
Oktyabrın 30-da axşam Vaşinqtondakı Milli Muzey binasında keçirilmiş ziyafətdə 600-a yaxın qonaq Azərbaycan mədəniyyəti və tarixi, arxitektura ənənələri və incəsənəti ilə tanış olublar, milli Azərbaycan yeməklərindən yeyiblər. Qonaqlar Bakıdan getmiş milli musiqi və rəqs ansambllarının ifalarına tamaşa ediblər. Bir sözlə, yaxşı əyləniblər.
Ziyafətə nə qədər pul xərcləndiyi açıqlanmır. Ancaq mərasimin təşkilatçısı olan lobbi şirkətinin nümayəndəsi azı yarım milyon dollardan söhbət getdiyini açıqlamışdı.
Press-relizdə deyilir ki, qala-ziyafət Azərbaycan Amerika Alyansının təsisçisi Anar Məmmədov tərəfindən təşkil olunub. Mərasimi Azərbaycanın ABŞ-dakı səfiri Elin Süleymanov açıb.
“Bu günü bayram edirik, sabahı qururuq” devizi altında təşkil edilmiş ziyafətdə muğam ustası Alim Qasımovun qrupu, “Azərbaycan inciləri” rəqs ansamblı, məşhur azərbaycanlı rəssamlar, rəqqasələr və müğənnilər də səhnədə yer alıblar.
A.Məmmədov ziyafətlə bağlı bildirib ki, Amerika auditoriyasının Azərbaycan musiqisinə, rəqslərinə, milli mətbəx nümunələrinə böyük marağına heyran olub. Biznesmen Azərbaycanla ABŞ arasında münasibətlərin əhəmiyyətindən danışaraq deyib ki, dünənki gecə “çox məxsusi və gözəl” gecə idi.
Mərasimdə Azərbaycan Amerika Alyansına sədrlik edən keçmiş konqresmen Dan Barton çıxış edib. Konqresmen bildirib ki, Azərbaycan Amerikanın əsl dostudur: “Olduqca mühümdür ki, biz Azərbaycanla əməkdaşlığı genişləndirək”.
Mərasimdə senatorlar Riçard Barr, Saksbi Çembliss, Ted Koqan, konqresmenlər Cin Qrin, Rendi Haltqrin, Robert Aderholt ,“The Washington Times” qəzetinin baş redaktoru Larri Bisli və digərləri iştirak ediblər. Tədbirə qatılanlar arasında bəzi ölkələrin Vaşinqtondakı səfirləri də olub./Virtualaz.org/
