Ağsu rayonu Heydər Əliyev küçəsi 79 ünvanında yaşayan Əfəndiyev Siyavuş Zabit oğlu həmin rayonun Qaz İstismar sahəsinin rəisi Xəyyam Allahverdiyevdən şikayətçidir.
S. Əfəndiyev “Qafqazinfo”ya müraciətində bildirib ki, 2014-cü ilin fevral ayından qazları kəsilib: “2011- ci ildə küçəyə smart tipli sayğaclar quraşdırılıb. Mən də həmişə kart vurub qaz işlətmişəm. Fevral ayında mənə gəlib dedilər ki, 154 manat borcun var. Borcun nədən yarandığını isə sübut edə bilmirlər. O gündən sayğacı pinkoda saldılar, qazsız qaldıq”.
Qaz İstismar sahəsinin rəisi Xəyyam Allahverdiyev isə Qaynar.info-ya bildirdi ki, Siyavuş Əfəndiyevin dedikləri həqiqətəuyğun deyil: "Mən kiməm ki, onun qazını kəsim, ya qanunsuz əlavə pul yazım. O, qanuni şəkildə burcludur və iki ildir bu borcu ödəmir. Ona dəfələrlə deyilib ki, borcun var, gəl ödə. O da şantaj yoluna keçib. Nə qədər mənim canım sağdır, o, qaz görməyəcək. Getsin Neft Şirkəti ilə problemi yoluna qoysun. O dövlətə borcludur".
Qeyd edək ki, Qaz İdarəsinin müdiri şikayətçi vətəndaş haqqında nalayiq sözlər də işlətdi. Etika xatirinə biz həmin ifadələri dərc etmirik.
Qaynar.info
