Bu gün Azərbaycan Premyer Liqasında ikinci tura start veriləcək.
Qaynarinfo xəbər verir ki, ilk oyun günündə 2 qarşılaşma baş tutacaq.
Günün ilk matçı Qəbələdə eyniadlı komanda ilə "Keşlə" arasında keçiriləcək. İndiyədək ölkə çempionatında 51 dəfə üz-üzə gələn kollektivlərin duelində meydan sahibləri 14, qonaqlar isə 19 qələbə qazanıb. 18 qarşılaşmada qalib müəyyənləşməyib. Topların fərqi də bakılıların xeyrinədir - 68-51. "Qəbələ” son üç matçda qol vurub. Rəqiblərin son dörd oyununda qonaq komanda qələbə qazanmayıb. Saat 18.00-da başlayacaq matçı Rəşad Əhmədov idarə edəcək. İlk turdan sonra "Qəbələ" 1 xalla 3-6-cı yerləri bölüşdürür. "Keşlə" isə 0 xalla sonuncu pillədə qərarlaşıb.
Digər qarşılaşma Sumqayıtda olacaq. Şəhərin eyniadlı təmsilçisi doğma azarkeşlər önündə "Sabah"ı qəbul edəcək. İndiyə qədər bu komandalar arasında keçirilən 11 oyunun 5-də meydan sahibləri, 4-də isə qonaqlar 3 xala sevinib. 2 görüş isə heç-heçə başa çatıb. "Sumqayıt"ın hesabında 15, "Sabah"da isə 12 qol var. Üç matçdır uduzmayan paytaxt təmsilçisi son altı qarşılaşmada qol vurub. "Sumqayıt” son üç ev oyununda 2 qol buraxmaqla məğlub olub. Mövsümə qələbə ilə başlayan Ayxan Abbasovun komandası turnir cədvəlinin ilk pilləsində qərarlaşıb. "Sabah" isə "Keşlə" ilə birlikdə 7-8-ci pillələri bölüşdürür. Saat 20.00-da "Kapital Bank Arena"da baş tutacaq qarşılaşmanı FIFA referisi Əliyar Ağayev idarə edəcək. Qarşılaşma saat 20:00-da start götürəcək.
Premyer Liqa
2021/22 mövsümü
I dövrə, II tur
21 avqust
18:00. "Qəbələ” – "Keşlə”
Hakimlər: Rəşad Əhmədov, Cavanşir Yusifov, Eyyub İbrahimov, Tural Qurbanov
Hakim-inspektor: Munis Abdullayev
AFFA nümayəndəsi: Eldəniz Musayev
Qəbələ şəhər stadionu
20:00. "Sumqayıt” –"Sabah”
Hakimlər: Əliyar Ağayev, Zeynal Zeynalov, Akif Əmirəli, Rauf Allahverdiyev
Hakim-inspektor: Rövşən Əhmədov
AFFA nümayəndəsi: Rüfət Əmirov
"Kapital Bank Arena”
Tura avqustun 22-də keçiriləcək "Zirə" - "Neftçi" və "Qarabağ" - "Səbail" matçları ilə yekun vurulacaq.
