Hazırkı prezident Co Baydenin prezident seçkilərində qalib gəlmək qabiliyyətinə dair şübhələr səbəbindən biznes liderləri Konqres seçkilərində digər Demokrat namizədlərə dəstəyi artırmağı planlaşdırır.

Bu barədə Qaynarinfo "Axios”a istinadən xəbər verir.

Qeyd olunur ki, bu qərara səbəb Baydenin noyabrda keçiriləcək prezident seçkilərində qalib gələ bilməsi ilə bağlı qeyri-müəyyənlikdir. Bu narahatlıqlar, xüsusilə, hazırkı prezidentin keçən həftə Donald Trampla fəlakətli debat performansından sonra güclənib.

Nəşrin işgüzar və siyasi dairələrdəki həmsöhbətləri bildiriblər ki, donorların bəziləri artıq Konqres seçkilərinin iştirakçılarına, xüsusən də Arizonadan Senata namizəd, Nümayəndələr palatasının hazırkı üzvü, demokrat Ruben Qalyeqoya vəsait köçürüblər.

Demokratlar partiyasındakı mənbənin sözlərinə görə, donorlardan biri Komitəyə ianəsini 50% artırıb ki, bu da demokratların Senata seçilməsinə töhfə verəcək. Debatdan sonra respublikaçılar və demokratların qalib gəlmək şanslarının bərabər olduğu ştatlarda namizədlərin təşviqat qərargahı ianələrin "axınını” qeydə alıb.

Rusiya Elmlər Akademiyasının ABŞ və Kanada İnstitutunun baş elmi işçisi Dmitri Koçequrov qeyd edib ki, demokratlar əslində Trampın qələbəsi ilə barışıblar və qanunvericilik mövqelərini gücləndirməyə diqqət yetirmək istəyirlər. Nümayəndələr palatasında qalib gəlmək və Senatda hakimiyyəti saxlamaq onlara bir çox cəbhələrdə Trampın siyasətini iflic etməyə imkan verəcək.

Eyni zamanda, "Dubravsky Consulting” şirkətinin rəhbəri Pavel Dubravski qeyd edib ki, indiki mərhələdə maliyyə vəsaitlərinin axınının azalması Bayden kampaniyasına o qədər də böyük ziyan vurmayacaq. Siyasi strateqin fikrincə, maliyyə Konqres kampaniyaları üçün daha vacibdir, çünki prezident səviyyəsində namizədin brendi həlledici amildir.

Trampın seçki kampaniyası 2024-cü ilin ikinci rübündə 331 milyon dollar topladığını bildirib. Demokratlara görə, Bayden və müttəfiqləri eyni müddət ərzində 264 milyon dollar toplayıblar.

Nəşr qeyd edib ki, donorlar hələ vəsaitlərin kütləvi şəkildə yönləndirilməsi ilə bağlı yekun qərar qəbul etməyiblər və uğursuz debatın Baydenin reytinqinə nə qədər təsir etdiyini başa düşmək üçün yeni sorğular gözləyirlər. İyunun 30-da "The Puck” tərəfindən açıqlanan özəl sorğuya görə, 2020-ci ildə Baydenə səs verənlərin 40%-i onun prezidentlik yarışından uzaqlaşdırılmasını dəstəkləyir. May ayında bu göstərici 25% təşkil edib. İki namizəddən hansını dəstəkləyəcəyi ilə bağlı qərarsız olan ştatlarda seçicilərin 55%-i hazırkı prezidentin kampaniyadan getməsinin tərəfdarı olub.

Xatırladaq ki, ötən cümə axşamı, iyunun 27-də ABŞ-da ABŞ prezidentliyinə əsas namizədlər Co Bayden və Donald Tramp arasında debatların birinci raundu keçirilib. Hazırkı prezident debat zamanı inamsız və hazırlıqsız görünüb və debatda məğlub olub.

Məğlubiyyətdən sonra bir sıra demokrat konqresmenlər və senatorlar Baydeni prezidentliyə namizəd kimi əvəzləmək barədə düşünməyə başlayıblar. Ən çox ehtimal olunan əvəzedici indiki vitse-prezident Kamala Harrisdir.

Xüsusilə, demokratlar Baydenin seçki yarışından geri çəkilməsini tələb edən məktub imzalamağı planlaşdırırlar.

İyulun 3-də "Bloomberg Surveillance”ın efirində demokratların əsas donorlarından biri Çarlz Mayers bildirib ki, Baydenin seçkidə iştirak edib-etməməsinə qərar vermək üçün "4-5” günü var.

Eyni zamanda, Bayden özü də gələcəkdə namizədliyini irəli sürmək niyyətində olduğunu bəyan edib və partiya həmkarlarını yenidən seçilməyə hazır olduğuna əmin edib.

Nizami Bağırov