Norveçin paytaxtı Osloda keçirilən dünya çempionatı davam edir.
Qaynarinfo xəbər verir ki, bu gün Azərbaycanın son iki sərbəst güləşçisi döşək üzərinə çıxacaq. Belə ki, 70 kq çəki dərəcəsində çıxış edən Turan Bayramov 1/8 finalda Adam Batırov (Bəhreyn) / Zaur Əfəndiyev (Serbiya) cütünün qalibi ilə üz-üzə gələcək.
97 kq-dakı İslam İlyasov isə eyni mərhələdə Belarusdan olan Aleksandr Xuştinlə güləşəcək.
Bu gün həmçinin 92 kq-da yarışan Osman Nurməhəmmədov bürünc medal uğrunda görüşə çıxacaq. O, Hyeokbeom Qvon (Koreya) / Omarhacı Məhəmmədov (Belarus) duelinin qalibi ilə qarşılaşacaq.
Sərbəst güləşçilərimizdən hələ ki, yalnız Abubakr Abakarov (86 kq) bürünc medal qazanıb. Təsnifat qarşılaşmaları Bakı vaxtı ilə saat 12:30-da, medal uğrunda görüşlər isə saat 20:00-da start götürəcək.
Səbuhi Həsənov
