“Davam” tərəfindən “Xocalıya Ədalət” həftəsi həyata keçirilib (FOTOLAR)

Həftəyə 21 fevral tarixində "Xocalı soyqırımı - misli görünməmiş faciə” adlı tədbir ilə start verilib. Tədbirdə millət vəkilləri Aydın Mirzəzadə və Naqif Həmzəyev, Xocalı soyqırımı şahidi Mürvət Məmmədov, "Davam” Gənclər Hərəkatının baş katibi Nigar Aslanova və davamçılar iştirak edib. Tədbir zamanı natiqlər Xocalı soyqırımı ilə bağlı fikirlərini gənclərlə bölüşüb, törədilən soyqırım cinayətinə beynəlxalq müstəvidə lazımi hüquqi qiymətin veriləcəyi günə qədər gənclərin hərəkətverici qüvvəsi ilə Xocalı həqiqətlərinin təbliğ olunmasının, xalqımızın qan yaddaşının nəsildən-nəslə ötürülməsinin vacibliyi kimi məsələlər ətrafında çıxışlar ediblər.

22 fevral tarixində "Davam” Gənclər Hərəkatı, "Qeyd-Sosial Maarifləndirmə" İctimai Birliyi, Azərbaycan Dövlət İqtisad Universiteti Tələbə Həmkarlar İttifaqı Komitəsi, UNEC Dizayn Məktəbinin birgə təşkilatçılığı ilə "Xocalı soyqırımı - XX əsrin faciəsi” adlı rəsm sərgisi keçirilib. Yaradıcı gənclərin sərgidə nümayiş olunan rəsm əsərlərində Azərbaycan xalqının Xocalı soyqırımı ilə bağlı hüzn və kədəri, erməni vandalizmi və Xocalı həqiqətləri öz əksini tapıb.

23 fevral tarixində Bakı Gənclər Mərkəzi və "Davam” Gənclər Hərəkatının birgə təşkilatçılığı ilə CBC TV-nin əməkdaşı Elşən Rüstəmov tərəfindən lentə alınmış və Xocalı soyqırımı şahidi Mürvət Məmmədovun yaşadığı dəhşətlərdən bəhs etdiyi "Отнятое детство” ("Oğurlanmış uşaqlıq”) adlı filmin nümayişi baş tutub. Nümayişdə Bakı Gənclər Mərkəzinin direktoru Nərgiz Babayeva, "Davam” Gənclər Hərəkatının sədr müşaviri Niyaz Əliyev, Xocalı soyqırımı şahidi Mürvət Məmmədov və gənclər iştirak edib.

25 fevral tarixində fəlsəfə elmlər doktoru Eyyub Kərimov ilə "Xocalı soyqırımı - bəşəriyyət tarixinin qanlı səhifəsi” adlı görüş baş tutub. Görüş zamanı Xocalı hadisələri ilə bağlı tarixi faktlar və həqiqətlər dilə gətirilib, gənclərin çoxsaylı sualları cavablandırılıb.

25 fevral tarixində "Davam” Gənclər Hərəkatının katibliyi və davamçı gənclər Bakının Xətai rayonunda faciə qurbanlarının xatirəsinə ucaldılmış "Ana harayı” abidəsini ziyarət ediblər.

25 fevral gecə saatlarından etibarən Xocalı hadisələri ilə bağlı tarixi həqiqətləri dünya ictimaiyyətinə çatdırmaq məqsədi ilə "Xocalı üçün Paylaş” adlı sosial media kampaniyasına start verilib. 500-dən çox gəncin iştirakı ilə 27 fevral səhər saatlarına kimi davam edən kampaniya çərçivəsində sosial şəbəkələrdə çoxsaylı videoçarx, kəps və sənədli filmlər paylaşılıb. 

Bu paylaşımların nəticəsi olaraq #JusticeforKhojaly dünya trendində ilk yeri tutub, "#KhojalyGenocide”, "#HocalıKatliamı”, "#Azerbaijan” həştəqləri isə dünya trendində ilk beşliyə yüksəliblər.

İstifadə edilən həştəq həmçinin Türkiyə, Pakistan, Fransa, İngiltərə, və Avstriyada ölkə trendinə düşməyə müvəffəq olublar. Eyni zamanda "#KhojalyGenocide” həştəqi Ermənistan trendində 2-ci yerdə qərarlaşıb. Ümumilikdə kampaniya 4 milyona yaxın istifadəçiyə çatıb.

26 fevral tarixində "Davam” Gənclər Hərəkatının təşkilatçılığı, "Murmur Azerbaijan”ın dəstəyi ilə paytaxt Bakının mərkəzi küçələrində "Biz Xocalını unutmadıq!” devizi ilə rəqəmsal fləşmob həyata keçirilib. 

Belə ki, Xocalı soyqırımı ilə bağlı tarixi faktların yer aldığı və həmin hadisələrə aid olan xüsusi fotoşəkillərin əks olunduğu xüsusi posterlər çiyin çantalarında yerləşdirilmiş xüsusi monitorlarla Bakının mərkəzi küçələrində nümayiş etdirilib. Maarifləndirici materiallar azərbaycan, ingilis və rus dillərinə tərcümə olunmaqla xüsusi dizaynla hazırlanıb. Görüntülər şəhərimizin qonaqları və Bakı sakinlərinin diqqət mərkəzində olub.

Həftə ərzində "Davam” Gənclər Hərəkatının katibliyi və üzvləri Azərbaycan Respublikası Gənclər Təşkilatları Milli Şurasının təşkilatçılığı ilə keçirilən "Xocalı soyqırımı: Gənclər və gənclər təşkilatlarının faciənin tanıdılmasında rolu” mövzusunda konfrans və "Xocalıya ədalət” beynəlxalq məlumatlandırma kampaniyası çərçivəsində, Qarabağ iqtisadi rayonuna daxil olan işğaldan azad olunmuş ərazilərdə (Şuşa rayonu istisna olmaqla) Azərbaycan Respublikası Prezidentinin xüsusi nümayəndəliyi və Azərbaycan Gənclər Fondunun təşkilatçılığı ilə baş tutan "Unudulmayan tarix” adlı anım tədbirində iştirak ediblər.

Ümumilikdə, "Xocalıya Ədalət” həftəsi çərçivəsində birbaşa 2500-dən çox, dolayı yolla 25 mindən çox, virtual olaraq isə 4 milyondan çox insana Xocalı soyqırımı ilə bağlı maarifləndirici məlumatlar çatdırılıb.