Əbu-Dabi polisi sosial şəbəkələr vasitəsilə narkotiklərin qanunsuz dövriyyəsi ilə məşğul olan dəstəni yaxalayıb. Rəsmi Emirates agentliyinin xəbərinə görə, müxtəlif millətlərdən olan 142 nəfərin daxil olduğu cinayətkar şəbəkədən 816 kiloqram narkotik vasitə aşkarlanaraq götürülüb.
Qaynarinfo xəbər verir ki, Əbu-Dabi polis departamentinin məlumatında cinayətkar şəbəkənin üzvlərinin müxtəlif sosial şəbəkələrdə uzun müddət apardıqları yazışmalar, paylaşdıqları fotoşəkillər və videomaterialların monitorinqinin keçirildiyi bildirilib. Dəstənin başçıları narkotik vasitələrin qanunsuz dövriyyəsini beynəlxalq telefon nömrələri vasitəsilə həyata keçiriblər. Polis əməkdaşları şəbəkə üzvlərinin ünvanlarını təsbit edərək külli miqdarda narkotik həblər və onların satışından əldə edilən pul vəsaitlərini ələ keçiriblər.
Şəbəkə üzvləri haqqında açılmış cinayət işi məhkəməyə göndərilib.
