Reportyorların Azadlıq və Təhlükəsizlik İnstitutunun (RATİ) 10 aydır İsveçrənin Bakıdakı səfirliyində gizlənən rəhbəri Emin Hüseynov artıq İsveçrədədir. "Azadlıq" radiosunun məlumatına görə, o, I Avropa Oyunlarının açılış mərasimində iştirak edən İsveçrənin xarici işlər naziri Didier Burkhalterin təyyarəsi ilə ölkədən çıxıb.
Bunu İsveçrənin Xarici İşlər Nazirliyindən bildiriblər. Nazirliyin rəsmisi Jean-Mark Krevoisier ATS agentliyinə deyib ki, E.Hüseynovun ölkədən çıxarılması iki ölkə arasında uzun danışıqlar nəticəsində baş tutub.
O, 35 yaşlı jurnalist və ictimai fəalın hazırda Berndə olduğunu, mediaya danışmaq istəmədiyini bildirib. Krevoisierin dediyinə görə, E.Hüseynova sentyabradək viza verilib. Bundan sonra o, sığınacaq istəyib-istəməmək məsələsini özü həll edəcək.
E.Hüseynov 2014-cü ilin avqustundan İsveçrə səfirliyində gizlənirdi. Ona qarşı cinayət işi açılıb və həbs təhlükəsi var. Digər hüquq müdafiəçisi kimi, ona qarşı qanunsuz fəaliyyət, vergidən yayınma və s. ittihamlar irəli sürülüb.
Qaynar.info
