"Beynəlxalq Avtomobil Federasiyasının tələblərinə əsasən, Formula 1 Bakı Qran-Pri ilə əlaqədar Mərkəzi Neftçilər Xəstəxanasının (MNX) reanimasiya və anesteziologiya şöbəsinin nəzdində xüsusi şəraitə malik yanıq palatası yaradılır".
Qaynarinfo.az bildirir ki, bunu APA-ya MNX-nın Təcili tibbi yardım şöbəsinin müdiri R.Əsədov deyib.
O bildirib ki, Səhiyyə Nazirliyi və MNX-nın rəhbərliyi tərəfindən yanıq palatasının sxemi hazırlanaraq təsdiq olunub: "Səhiyyə Nazirliyi tərəfindən artıq lazımi tibbi avadanlıq sifariş olunub. Tibbi avadanlıq mayın 15-20-si aralığında Bakıya gətiriləcək. Yanıq palatası bütün standartlara uyğun hazırlanıb. Müvafiq olaraq 10 nəfər həkim və 10 nəfər tibb bacısına Mərkəzi Neftçilər Xəstəxanasında Səhiyyə Nazirliyi tərəfindən məşğələ keçirilib. Reanimasiya şöbəsinin 2 həkimi və 2 tibb bacısı Türkiyənin Ankara şəhərində yerləşən yanıq mərkəzində 1 aylıq təlimdə olublar".
Şöbə müdiri qeyd edib ki, Formula 1 Bakı "Gran Prix" ilə əlaqədar hazırda Türkiyədən dəvət olunmuş həkim-mütəxəssis Bakıdadır: "Həmin professor Bakıdadır. O xəstəxanada yanıq palatasının heyəti və 103 təcili yardım xidməti üçün seminarlar keçirir. Eyni zamanda, Formula 1 Bakı "Gran Prix" ilə əlaqədar MNX-da təcili hallarda koordinasiya, ilk yardım və ixtisaslaşdırılmış yardım sistemi üzərində çalışır".
R. Əsədov əlavə edib ki, yanıq palatasında işlər mayın 15-20-si tam yekunlaşacaq.
Qeyd edək ki, MNX Formula 1 Qran-Pri ilə əlaqədar əsas tərəfdaş xəstəxana olaraq nəzərdə tutulub. Formula-1 Bakı Qran-Prisinə bu il iyunun 19-da Bakıda saat 18:00-da start veriləcək.
Qaynarinfo.az
