Latviyanın xarici işlər naziri Bayba Braje xəbərdarlıq edib ki, Kremlin rəhbəri Vladimir Putin Ukraynaya qarşı apardığı müharibədə əldə edə bilmədiklərini sülh danışıqları vasitəsilə reallaşdırmağa çalışacaq – ABŞ-ı zəiflətmək və Ukrayna üzərində nəzarəti bərpa etmək.

Qaynarinfo xəbər verir ki, bu barədə Associated Press yazır.

Braje qeyd edib ki, 140 milyon əhalisi olan Rusiya 2014-cü ildə Krımı işğal etdikdən və 24 fevral 2022-ci ildə genişmiqyaslı müdaxiləyə başladıqdan sonra 40 milyon əhalisi olan Ukraynanın cəmi 20%-dən azına nəzarət edə bilib. Putinin ABŞ-ı və NATO-nu zəiflətmək və Kiyevdəki demokratik hökuməti devirmək cəhdi uğursuzluğa düçar olub.

Buna görə də sülh axtarışları məsələsində Braje hesab edir ki, əsas çətinliklər Rusiyadan qaynaqlanır: "Çünki Rusiya ABŞ-ın gücünü zəiflətmək və onu dünyada daha da zəiflətmək istəyən tərəfdir”.

Onun sözlərinə görə, dünya artıq şahid olub ki, Putin digər ölkələrə müdaxilə edərkən yalnız əraziyə nəzarət etməklə kifayətlənmir, həm də onların hökumətlərinin siyasi seçimlərini idarə etmək istəyir. Məsələn, Suriyada o, avtoritar lider Bəşər Əsədə dəstək verərək Aralıq dənizi sahillərində hərbi bazalar əldə edib.

Lakin Putin Ukraynadakı üçillik müharibədə istədiklərinə nail ola bilməyib və Brajenin fikrincə, indi o, bu hədəflərinə sülh danışıqları yolu ilə çatmağa çalışacaq.

"Ona görə də müzakirə etdiyimiz və ya bağladığımız istənilən razılaşmada bu perspektivi aydın şəkildə nəzərə almaq vacibdir”, – deyə o vurğulayıb.

Braje bildirib ki, ötən həftə Səudiyyə Ərəbistanında aparılan danışıqlarda yalnız ABŞ və Rusiya rəsmiləri iştirak etsə də, "Avropa da” bu müzakirələrə daxil olub, çünki həm Ukrayna, həm də ABŞ ilə daimi təmasdadır.

Ötən həftə Latviya elan edib ki, gələn il müdafiə xərclərini ÜDM-in 4%-nə qədər artıracaq və 5%-ə doğru hərəkət edəcək.

"Biz öz hərbi imkanlarımıza sərmayə qoyuruq. İstərdik ki, bütün avropalılar da eyni addımı atsınlar. Bu, müzakirə etdiyimiz məsələlərdən biridir”, - Braje bildirib.

NATO üzvü olan Latviya və qonşu Baltikyanı ölkələr – Estoniya və Litva – gələcəkdə Rusiyadan gələ biləcək istənilən təcavüzə hazır olmalıdır. Brajenin sözlərinə görə, bu ölkələr diqqəti erkən xəbərdarlıq, operativ reaksiya, hərbi güc və siyasi iradə vasitəsilə Rusiya təhdidini neytrallaşdırmağa yönəldib.

Xatırladaq ki, Çexiyanın xarici işlər naziri ABŞ-ın Rusiya ilə danışıqlara başlamasının bu müzakirələrin nəticəsinin hansısa ciddi dəyişikliyə səbəb olacağı anlamına gəlmədiyini bəyan etmişdi.

18 fevralda Səudiyyə Ərəbistanında Rusiya və ABŞ-ın yüksək səviyyəli rəsmilərinin iştirakı ilə Ukraynanın qatılmadığı görüş keçirilib. Tərəflər ikitərəfli münasibətlərdəki "gərginlikləri aradan qaldırmaq” və Rusiya-Ukrayna müharibəsi üzrə danışıqlara hazırlıq işlərini davam etdirmək barədə razılığa gəliblər.

Alpər