Müsavat Partiyası AXCP-nin onu hakimiyyətlə sövdələşməyə getməkdə ittiham etməsinə təəssüf edir. Bu barədə Trend-ə Müsavat Partiyası başqanının müavini Mehman Cavadoğlu deyib.
M.Cavadoğlu bildirib ki, zaman-zaman Müsavat Partiyası hakimiyyətə işləməkdə itiham olunub: "Çox təəssüf ki, bu məsələdə Müsavat Partiyasının opponentləri hakimiyyətlə eyni mövqedədirlər".
M.Cavadoğlu qeyd edib ki, Müsavat Partiyası indiyə qədər hakimiyyətlə heç bir sövdələşməyə getməyib və bundan sonra da getməyəcək.
AXCP-nin Müsavat Partiyasına bu cür qısqanc münasibət bəsləməsinə gəlincə isə, başqan müavini bu sualı AXCP-yə ünvanlamağı məqsədəuyğun hesab edir: "Müsavat Partiyası AXCP ilə həmişə əməkdaşlığa hazırdır. Məsələ daha çox AXCP-nin rəyindən və mövqeyindən asılıdır".
Qeyd edək ki, Müsavat Partiyası Milli Şuradan çıxması barədə qərar verib. Bundan sonra AXCP Müsavat Partiyasını hakimiyyətlə sövdələşmədə ittiham edib.
