"İstər
mikrosahibkarlara, istərsə də işsiz vətəndaşlar üçün verilən məbləğ çox da
böyük olmayacaq”.
Bunu
Qaynarinfo-ya açıqlamasında iqtisadçı ekspert Natiq Cəfərli Şəki, Lənkəran şəhərlərinin,
Qax, Zaqatala, Biləsuvar, Cəlilabad, Masallı, İsmayıllı, Quba, Xaçmaz
rayonlarında tətbiq edilən sərt karantin tədbirlərindən danışarkən deyib.
Ekspert qeyd edib ki, sözügedən şəhər və rayonlarla bağlı nəzərdə tutulan məbləğ
büdcəyə təsirsiz ötüşəcək:
"Əslində
bu, böyük həcmdə maliyyə vəsaiti deyil. Çünki qərarda sərt karantin qaydası 10
bölgəyə nəzərdə tutulub. Aprel-may aylarında bu qərar 600 min insana həvalə
edilirdi. Sonradan isə bu rəqəmdə 284 minə kimi azalma olmuşdu. İndi bu rəqəm
daha da aşağı olacaq. Göründüyü kimi, qərarda böyük bölgə - Bakı və Sumqayıt,
Abşeron əhatə olunmayıb. Ona görə də 10 bölgə ilə bağlı böyük maliyyə vəsaitinin
verilməsinə ehtiyac olmayacaq. Çox güman ki, büdcədə bu vəsaitlərin ödənilməsi
üçün ehtiyat fondunda maliyyə var. Düşünürəm ki, Nazirlər Kabinetinin ehtiyat
fondundan ödənişlər olacaq. Mikrosahibkarlıqla bağlı nəzərdə tutulan məbləğin
özü çox da böyük olmayacaq. Amma əhatə dairəsi bir neçə min insanı əhatə edəcək”.
Natiq
Cəfərli bildirib ki, qərarda göstərilən ödənişlərin ödənilməsinə büdcənin kifayət
qədər imkanları var:
"Ümumilikdə
götürəndə həm torpaqların işğaldan azad edilməsi, həm də pandemiyadan yaranan
problemlər büdcənin üzərinə əlavə yüklər gətirdi. Ona görə də büdcənin kəsir
hissəsi son illərin ən yüksək həddinə çatıb. Gələn il daha böyük xərcləmələr
olacaq. Ona görə büdcənin Milli Məclisə təqdim olunması Nazirlər Kabineti,
Maliyyə Nazirliyi tərəfindən yubadılır”.
Natiq
Cəfərli qeyd edib ki, gələn il işğaldan azad olunan torpaqlarda infrastrukturun
qurulması və təhlükəsizlik tədbirlərinin görülməsi də əlavə xərclərdir:
"Çox
güman ki, gələn ilin təsdiq olunan dövlət büdcəsində maliyyə yükü daha da artıq
olacaq”.
Qeyd
edək ki, Nazirlər Kabineti yanında Operativ Qərargah Şəki, Lənkəran şəhərlərinin,
Qax, Zaqatala, Biləsuvar, Cəlilabad, Masallı, İsmayıllı, Quba, Xaçmaz
rayonlarının inzibati ərazisində sərt karantin qaydalarının tətbiq olunması ilə
bağlı qərar verib. Qərara görə, adı gedən rayonlarda muzdlu işçilərin əmək haqları
üzrə müvafiq ödənişlər ediləcək və fərdi (mikro) sahibkarlara birdəfəlik maliyyə
dəstəyi göstəriləcək. Bundan əlavə isə Əmək və Əhalinin Sosial Müdafiəsi
Nazirliyinə sərtləşdirilmiş xüsusi karantin rejiminin tətbiq olunduğu 10 şəhər
və rayon üzrə işsiz və xüsusi karantin rejiminə görə gəlirini itirən
qeyri-formal işləyən aztəminatlı şəxslərə yaşayış minimumu həcmində (190 manat)
birdəfəlik ödəmə verilməsi tapşırılıb.
Bahar
Rüstəmli
