Reper Şon “P.Diddi” Kombs mərhum həmharı Tupak Şakurun qətli ilə bağlı ittihamlarla üzləşə bilər. Hüquq mənbələrinin bildirdiyinə görə, yeni məhkəmə prosesi musiqi maqnatının bu iş üzrə cinayət məsuliyyətinə cəlb olunmasına yol aça bilər.

Qaynarinfo xəbər verir ki, bu barədə "The Telegraph" yazıb.

Şakurun 1996-cı ildə Las-Veqasda şöhrətinin zirvəsində olduğu vaxt avtomobildən açılan atəş nəticəsində öldürülməsindən 30 il sonra Duane “Kiffi Di” Devis qətlin planlaşdırılmasında ittiham olunur. İttihama görə, hadisə Los-Ancelesdəki iki küçə dəstəsi arasında getdikcə şiddətlənən qarşıdurmanın bir hissəsi olub.

Prokurorluğun işi əsasən Devisin polisə verdiyi ifadələrə, sənədli filmlərdəki müsahibələrinə və avtobioqrafiyasına əsaslanır. Devis həmin mənbələrdə rəqib dəstə ilə münaqişə çərçivəsində qardaşı oğlunun hədəfə alınmasından sonra Şakuru axtardığını bildirib.

İttiham tərəfi həmçinin Devisin ölümcül güllənin atıldığı ağ rəngli "Cadillac"da olduğunu və silahı reperi öldürən şəxsə “atdığını” iddia edir.

2008-ci ildə polis tərəfindən gizli şəkildə qeydə alınan və hazırda məhkəmədə sübut kimi təqdim olunan söhbətdə Devisin 1996-cı ildə "South Side Compton Crips" dəstəsinin digər üzvləri ilə birlikdə Şakuru izləyərək öldürdüklərindən danışdığı bildirilir.

Həmin gizli səs yazısında Devisin hazırda federal fahişəliklə bağlı ittihamlar üzrə 50 aylıq həbs cəzası çəkən Kombsun Şakuru öldürmək üçün ona 1 milyon dollar təklif etdiyini də iddia etdiyi bildirilir.

Klark dairəsinin prokurorluğuna yaxın mənbə "The Telegraph"a bildirib ki, Devis təqsirli bilinərsə, bu, Kombsa qarşı tədbir görülməsinə “yaşıl işıq” yandıra bilər. Devis isə həmin açıqlamalarının şöhrət qazanmaq və diqqət çəkmək məqsədilə verildiyini, həqiqəti əks etdirmədiyini deyir.

Prokurorlar iddia edirlər ki, Şakur həmin gecə Devisin qardaşı oğlu Orlando Andersonun döyülməsinə görə qisas məqsədilə öldürülüb. Onların fikrincə, Devisin reperin qətlində iştirakı barədə öyünməsi doğrudur.

Kombs daha əvvəl bu ittihamları “tamamilə uydurma və gülünc” adlandırıb.

Kombs ilə Şakur arasındakı 1990-cı illərə gedib çıxan uzunmüddətli qarşıdurmanın əsas səbəblərindən biri reperin silahlı basqın zamanı güllələnməsi olub. Şakur onun Kombs və tərəfdaşları tərəfindən tələyə salındığına inanırdı. Vəziyyət "Notorious B.I.G." kimi tanınan Kristofer Uollesin "Who Shot Ya?" mahnısının yayımlanmasından sonra daha da gərginləşib.

Əgər andlılar Devisin qətldəki rolu barədə həqiqəti söylədiyinə inanaraq onu təqsirli bilsələr, bu, Kombsun hadisədə iştirakı və onun guya verdiyi pul barədə iddialarına əlavə əsas verə bilər.

Klark dairəsi prokurorluğunun nümayəndəsi bildirib: “Diddiyə qarşı hansı ittihamların irəli sürülə biləcəyi məsələsi hələ də açıqdır. Lakin andlılar Devisi təqsirli bilsələr, bu, Diddiyə qarşı tədbir görülməsi üçün yaşıl işıq yandıracaq”.

Onun sözlərinə görə, Kombsun bu hadisələrdəki iddia olunan rolunun hazırkı mərhələdə işə daxil edilməməsi strategiyası davam edir. Çünki bunun məhkəmə prosesini və andlıların qərarını qarışdıra biləcəyi düşünülür.

Devisin vəkili Maykl Sanft isə müdafiə çıxışında müvəkkilinin əvvəlki etiraflarına görə daha əvvəl ittiham edilməməsinin səbəbinin istintaqçıların onun “boş-boş danışdığını” bilməsi olduğunu bildirib.

Klark dairəsinin prokuroru Stiv Volfson Devisin məhkəməsindən sonra Kombsa qarşı ittiham irəli sürülüb-sürülməyəcəyi barədə açıqlama verməyib. Polis də Kombsu qətldə şübhəli şəxs kimi göstərməyib. O isə hadisədə iştirakını inkar edir.

Kombs məhkəmədə şahid kimi çıxış etməyəcək. Lakin onun adı prosesdə hallanacaq. Klark dairəsinin baş prokuror müavini Binu Palal bildirib ki, hip-hop maqnatı Devisi Qərb sahilinə səfərləri zamanı mühafizə üçün işə götürüb. Bununla belə, Kombsun Şakuru öldürmək üçün Devisə pul təklif edib-etmədiyi məsələsi çıxışda qaldırılmayıb.

Həmin dövrdə Kombs Nyu-Yorkda yerləşən "Bad Boy Records" şirkətinə rəhbərlik edirdi və Şakuru təmsil edən "Death Row Records"un rəhbəri Suq Nayt ilə ciddi rəqabət aparırdı.

Şakurun və altı ay sonra "Bad Boy"un reperi "Notorious B.I.G."in, həmçinin "Biggie Smalls" kimi tanınan Kristofer Uollesin avtomobildən açılan atəş nəticəsində öldürülməsi 1990-cı illərdə ABŞ-da Qərb və Şərq sahillərinin hip-hop rəqabətinin zirvəsini nümayiş etdirib. Bu qətllər ABŞ tarixində ən çox diqqət çəkən açılmamış cinayətlərdən ikisinə çevrilib.

Devisin məhkəməsində Kombsla əlaqəli bir neçə şəxsin də ifadə verməsi gözlənilir. İş üzrə təqdim edilmiş şahid siyahısına onun "Bad Boy Records"dakı keçmiş biznes tərəfdaşı və keçmiş mühafizəçisi, həmçinin hazırda avtomobillə törədilmiş cinayətə görə 28 il həbs cəzası çəkən rəqibi Suq Nayt da daxildir.

Kombs 2025-ci ildə cinsi insan alveri və reketçilik ittihamları üzrə məhkəmə qarşısına çıxarılıb. O, ömürlük həbs cəzası ilə üzləşə bilərdi, lakin ən ağır ittihamlar üzrə bəraət alıb. Nəticədə daha yüngül, fahişəliklə bağlı ittihamlar üzrə 4 il 2 ay müddətinə azadlıqdan məhrum edilib.

Hüquq ekspertləri bildiriblər ki, Devis təqsirli bilinsə belə, Kombsa qarşı ittiham irəli sürülməsi iddialı prokuror üçün cəlbedici variant ola bilər.

Las-Veqaslı vəkil Sem Mireyovski hesab edir ki, Kombsun əvvəlki məhkəmə prosesində məsuliyyətdən daha ağır nəticələr olmadan çıxması fonunda bu iş prokuror üçün daha cəlbedici ola bilər.

Keçmiş FTB əməkdaşı, Uollesin qətli ilə bağlı istintaqda çalışmış Fil Karson isə hesab edir ki, Kombsun ətrafındakı bəzi şəxslər ötənilki məhkəmə prosesindən sonra onun çevrəsinin dağılması fonunda yeni məlumatlarla çıxış edə bilərlər.

Karson bildirib ki, Tupakın qətli barədə məlumatı olan, həm Tupaka, həm də Diddiyə yaxın şəxslər hüquq-mühafizə orqanlarına məlumat verə və Kombsun mümkün təqibinə kömək edə bilərlər.

Cinayət işləri üzrə vəkil Sem Bassett isə məhkəmə prosesinin yeni məlumatların üzə çıxmasına səbəb ola biləcəyini qeyd edib. Onun sözlərinə görə, şahidlərlə danışarkən və onları ifadə verməyə hazırlayarkən istintaq zamanı əvvəllər məlum olmayan məlumatlar tez-tez ortaya çıxır.

Mireyovski isə “Kombsun belində nəhəng hədəf var” deyib.

O, əlavə edib: “Mənim fikrimcə, sübutlar bir qədər zəifdir. Lakin istər ştat, istərsə də federal səviyyədə prokurorun işə qarışmaq motivasiyası yüksəkdir. Mən onun yerində olmaq istəməzdim”.

Aydın