İranın Qərbi Azərbaycan ostanında milliyyətcə kürd olduğu düşünülən gənc qadının müəmmalı qətlində şübhəli bilinən bir nəfərin həbs olunduğu xəbər verilib.
İranın hakimiyyət orqanları xəbər verirlər ki, Qərbi Azərbaycan ostanının Mahabad şəhərində bir mehmanxana qulluqçusunun müəmmalı qətlindən sonra baş vermiş iğtişaşların ardınca şübhəli qismində bir kişi həbs edilib.
Ostanın mərkəzi şəhəri olan Mahabadın prokuroru Aslan Heydəri İRNA agentliyinə bildirib ki, bu qadının ölümü ilə bağlı məsələ ciddi araşdırılır.
25 yaşlı Fərinaz Xosravani mayın 3-də şəhərdəki 4 ulduzlu “Tara” otelinin 4-cü mərtəbəsindən “yıxılaraq” həlak olub.
İraq Kürdüstanına məxsus rudaw.net internet saytı iddia edib ki, qadının ölümündə müəmmalı məqamlar var və şəhərin kürd əhalisi də məhz buna görə sonradan iğtişaşa çevrilən etirazlara başlayıb.
“Azadlıq” radiosu xəbər verir ki, Mahabadda kürd etnik azlığı ilə polis arasında əvvəllər də toqquşmalar baş verib.
“Tara” otelinin qarşısına yığılan etirazçılar iddia edirlər ki, F.Xosrovani oteldə təhlükəsizlik xidmətinin vəzifəli nümayəndəsi tərəfindən zorlanmaya məruz qalmamaq üçün qaçarkən həlak olub.
Etirazçılar bunun intihar hadisəsi ola biləcəyini də istisna etmirlər.
Lakin Qərbi Azərbaycan ostandarının müavini Əlirza Rədfar deyib ki, hazırda saxlanan şübhəli şəxsin təhlükəsizlik qüvvələri ilə heç bir əlaqəsi yoxdur.
Ə.Rədfar müxalifəti, “əksinqilabi” qruplaşma və mediaları qızışdırıcılıqda ittiham edib. O, həmçinin bildirib ki, etirazlar zamanı otelin yandırılması nəticəsində 7 polis də daxil olmaqla 25 nəfər xəsarət alıb.
Otelin yandırılması və etirazlarla bağlı bəzi video və fotolar sosial şəbəkələr vasitəsilə internetdə yayılıb.
Rudaw.net saytının yazdığına görə, Mahabadda vəziyyət gərgin olaraq qalır və əslində etirazlarla bağlı qeyri-müəyyən sayda həbs edilənlər var.
Ə.Rədfar bu hadisələrlə əlaqədar 5 nəfərin saxlandığını, başqa saxlananların isə az sonra azad edildiklərini bildirib.
İraqın Ərbil şəhərində mənzillənmiş ARA News saytı isə bildirir ki, iğtişaşlar zamanı azı iki etirazçı öldürülüb və 50 nəfər yaralanıb.
Sayt İran İnqilab Keçikçilərinin etirazçılara atəş açdığını iddia edib. Bundan əvvəl etirazçılara polisə məxsus iki maşına od vurublar.
Yaralılardan bəzilərinin İmam Xomeyni xəstəxanasına yerləşdirildiyi, “37 kürd etirazçının” həbs edildiyi bildirlir.
Mahabadda baş verən hadisələr barədə həmçinin Türkiyənin “Daily Sabah” saytı, “əl-Cəzirə” şəbəkəsi və “New York Times” qəzeti də xəbər veriblər.
Qaynar.info
