ABŞ Qida və Dərman Administrasiyasının Qida Məlumatları Mərkəzinin məlumatına görə, portağal şirəsi əsasən yüksək C vitamini tərkibi ilə tanınır. 100 qram təzə, pulpasız şirədə 30,5 milliqram C vitamini var ki, bu da böyüklər üçün tövsiyə olunan gündəlik normanın təxminən üçdə birinə bərabərdir.

Nəşrin məlumatına görə, C vitamini orqanizmdə bir sıra mühüm funksiyaları yerinə yetirir:

* Antioksidant təsir: Antioksidantlar hüceyrələrə zərər verən və ürək xəstəlikləri kimi xroniki xəstəliklərin inkişafına səbəb ola bilən sərbəst radikalları zərərsizləşdirir.

* İmmunitetin dəstəklənməsi: C vitamini immun hüceyrələrin fəaliyyətini dəstəkləyir. "Nutrients" jurnalında dərc olunan araşdırmaya görə, C vitamininin profilaktik qəbulu soyuqdəymənin müddətini qısaltmağa və simptomların şiddətini azaltmağa kömək edə bilər.

* Yaraların sağalması: C vitamini toxumaların strukturunda və yaraların sağalmasında mühüm rol oynayan kollagen zülalının istehsalı üçün vacibdir.

* Metabolizm: Bu vitamin həmçinin yağların enerjiyə çevrilməsinə kömək edən amin turşusu L-karnitinin sintezində iştirak edir.

Qeyd olunur ki, standart bir porsiya portağal şirəsində 29 mikroqram folat, yəni B9 vitamini var. Folat orqanizmə DNT və genetik materialın hazırlanmasına kömək edir və hüceyrə bölünməsində mühüm rol oynayır.

Məqalədə bildirilir ki, folatın ürək xəstəlikləri, xərçəng və Alzheimer xəstəliyi də daxil olmaqla bir sıra xəstəliklərin riskinin azalması ilə əlaqəli olduğuna dair müəyyən sübutlar var. Lakin bu istiqamətdə əlavə araşdırmalara ehtiyac olduğu vurğulanır.

Portağal şirəsi həmçinin yaxşı kalium mənbəyi ola bilər. Bir porsiyada 183 milliqram kalium var. Bu mineral qan təzyiqini aşağı salaraq ürəyin işemik xəstəliyi, insult və digər ürək-damar xəstəlikləri riskini azaltmağa, böyrək daşlarının yaranması ehtimalını azaltmağa və sümük sağlamlığını dəstəkləməyə kömək edir.

Təzə sıxılmış 100 faizlik portağal şirəsinin tərkibində polifenollar da var. "Advances in Nutrition" jurnalında dərc olunan araşdırma onların iltihab əlamətlərini azaltdığını göstərib.

Qəhvənin sağlamlıq üçün faydaları

Qəhvə yalnız səhər enerji verməsi ilə tanınmır. Nəşrin məlumatına görə, onun sağlamlıq üçün bir sıra digər potensial üstünlükləri də var:

* Stimullaşdırıcı təsir: Kofein beyindəki müəyyən reseptorları bloklayaraq oyanmağa, diqqət və ayıqlığı, zehni fəaliyyəti və fiziki koordinasiyanı artırmağa kömək edir. 237 millilitr dəmlənmiş qəhvənin bir porsiyasında 94,8 milliqram kofein var.

* 2-ci tip diabet riskini azalda bilər: Qəhvənin tərkibindəki polifenollar iltihabı azaldır və antioksidant kimi fəaliyyət göstərərək 2-ci tip diabet və piylənmə kimi əlaqəli vəziyyətlərdən qorunmağa kömək edə bilər.

* Neyrodegenerativ xəstəliklərin riskini azalda bilər: Bir sıra araşdırmalar orta miqdarda qəhvə istehlakının Alzheimer xəstəliyi, Parkinson xəstəliyi və demensiya kimi beyinə təsir edən xəstəliklərin daha aşağı riski ilə əlaqəli olduğunu göstərib.

* Ürəyi qoruya bilər: Metabolizmə təsiri, həmçinin 2-ci tip diabet və bununla əlaqəli xəstəliklərin riskinin azalmasındakı rolu sayəsində müntəzəm qəhvə istehlakı ürək-damar xəstəlikləri riskinin azalması ilə əlaqələndirilir.

* Ölüm riskini azalda bilər: Araşdırmalar göstərib ki, müntəzəm və orta miqdarda qəhvə istehlakı bütün səbəblərdən ölüm riskinin azalması ilə əlaqəlidir.

Nə seçmək lazımdır?

Nəşrin vurğuladığı kimi, hansı içkiyə üstünlük vermək sağlamlıq məqsədlərinizdən asılıdır. Vitamin və mineral almaq istəyirsinizsə, portağal şirəsinə, enerji və ayıqlığı artırmaq istəyirsinizsə, qəhvəyə üstünlük verə bilərsiniz.

Lakin məqalənin müəllifi kofein qəbulunun miqdarına diqqət yetirməyi tövsiyə edir. Gün ərzində və ya axşam saatlarında qəhvə içmək yuxunu poza bilər ki, bu da sağlamlığa mənfi təsir göstərə bilər.

Bundan əlavə, həddindən artıq qəhvə istehlakı ürəkdöyünmə, narahatlıq, əsəbilik, yüksək qan təzyiqi, baş ağrısı və əllərdə titrəmə kimi simptomlara səbəb ola bilər.

Nə qədər qəhvə və portağal şirəsi içmək olar?

Nəşrin məlumatına görə, kofeinin sağlamlıq üçün müəyyən faydaları olsa da, həddindən artıq qəbulu problem yarada bilər. ABŞ Qida və Dərman Administrasiyası böyüklərə gündə 400 milliqramdan çox kofein qəbul etməməyi tövsiyə edir. Bu, təxminən 236 millilitrlik dörd fincan qəhvəyə bərabərdir.

Portağal şirəsinə gəldikdə isə əsas problem şəkərdir. Məqalədə vurğulanır ki, şəkərin miqdarı portağal şirəsinin növündən asılıdır, çünki bəzi növlərin tərkibinə əlavə şəkər daxil edilir.

Aydın