Qaynarinfo xəbər verir ki, “The Independent” nəşrinin müəllifi Annabel Qrossman bu məsələ ilə bağlı həkimdən real risklərin nədən ibarət olduğunu soruşub.

Müəllif bir neçə həftə ərzində ABŞ, İndoneziya və Finlandiyaya ardıcıl üç səfər zamanı bir neçə saat qurşağını keçib. Onun sözlərinə görə, həkim diqqətini sutkalıq ritmin pozulmasının mənfi nəticələrini göstərən tədqiqatların sayının artmasına yönəldib.

Qrossman əvvəlcə bu sözlərə ciddi əhəmiyyət verməsə də, məsələ onu narahat etməyə davam edib. Buna görə də o, “University Hospitals of Leicester”in endokrinologiya üzrə məsləhətçisi və professoru Maylz Leviyə müraciət edərək belə həyat tərzinin həqiqətən təhlükəli olub-olmadığını öyrənib.

Həkim ona narahat olmamağı tövsiyə edib. Onun sözlərinə görə, yuxu rejiminin dəyişməsi insanın özünü həqiqətən çox pis hiss etməsinə səbəb ola bilər, lakin orqanizm buna kifayət qədər davamlıdır.

Qrossman həmçinin uzaq məsafəli uçuşlar zamanı orqanizmin məruz qaldığı digər təsirlərlə maraqlanıb. Onun sözlərinə görə, bir dəfə stomatoloq ağıl dişinin müayinəsi üçün çəkiləcək rentgenin Nyu-Yorkdan Los-Ancelesə uçuş zamanı alınan radiasiya dozasına təxminən bərabər olduğunu deyib. Bu isə onu tez-tez minlərlə kilometr məsafəyə uçduğu üçün əlavə şüalanmaya məruz qalması barədə narahat edib.

Lakin Maylz Levi bununla bağlı da narahatlığa əsas olmadığını bildirib: “Radiasiya əslində əhəmiyyətli risk yaratmır və hətta çox tez-tez uçan insanlar üçün belə ikinci dərəcəli amil olaraq qalır".

Digər risklər

Səyyahların bilməli olduğu, lakin həddindən artıq qorxmamalı olduğu əsas sağlamlıq risklərindən biri dərin venaların trombozudur (DVT).

Maylzun sözlərinə görə, uzunmüddətli uçuş zamanı ən vacib məqam susuzlaşmaya yol verməmək və kifayət qədər su içməkdir.

“Bu, həmçinin DVT yaranma ehtimalını azaldacaq. Dörd saatdan çox davam edən istənilən uçuş zamanı salonda gəzmək və baldır əzələləri üçün hərəkətlər etmək lazımdır”, deyə o bildirib.

Həkimin sözlərinə görə, dərin venaların trombozu riski yüksək olan insanlar kompressiya corablarından istifadə etməli və ailə həkimi ilə məsləhətləşməlidirlər.

Mütəxəssis həmçinin təyyarə salonlarının infeksiyalar üçün əlverişli mühit olub-olmaması və bunun uçuşdan sonra xəstələnmə riskini artırıb-artırmaması məsələsinə toxunub.

“Uçuşlardan sonra həmişə boğazım ağrıyır”, deyə Maylz qeyd edib.

Onun fikrincə, çoxlu sayda tanımadığı insanın, o cümlədən uşaqların və körpələrin olduğu metal salonda qalmaq və ventilyasiya sistemi virus infeksiyalarının yayılması üçün əlverişli şərait yarada bilər. Məhz buna görə də bəzi insanların təyyarə ilə səyahətdən sonra COVID-19-a yoluxduğu ehtimal edilir.

Nəticə etibarilə, ildə bir neçə dəfə, hər dəfə bir neçə saat təyyarədə səyahət etmək — iş və ya istirahət məqsədilə uçan insanların əksəriyyətində olduğu kimi — sağlamlıq problemləri riskinin əhəmiyyətli dərəcədə artması demək deyil.

Buna görə əsas tövsiyə sadədir: kifayət qədər su için və səyahət etməyə davam edin.

Aydın