ABŞ-ın Ohayo ştatından olan əkiz bacılar Meri Elis Heyli və Meri Cin Holtsauer avqustun 21-də 100 yaşlarını qeyd ediblər.
Qaynarinfo "Today" nəşrinə istinadən xəbər verir ki, 1926-cı ildə anadan olan bacılar bir əsr ərzində ailə həyatı, həyat yoldaşlarının vəfatı, övlad, nəvə və nəticələrin dünyaya gəlməsi kimi müxtəlif hadisələr yaşayıblar. Yaxın vaxtlara qədər onların hər biri öz evində yaşayıb və 90 yaşlarına qədər avtomobil idarə edib.
Hazırda bacılar StoryPoint adlı yaşlılar üçün yaşayış kompleksində bir-birinə yaxın, lakin ayrı mənzillərdə yaşayırlar. Onlar birlikdə binqon oynamağı, filmlərə baxmağı və əl işləri ilə məşğul olmağı sevirlər.
Bacılar uzunömürlülüklə bağlı beş məsləhətlərini bölüşüblər.
1. Başqalarına kömək edin
“Bir çox insanın qayğısına qalırdım. Onların köməyə ehtiyacı vardı və mən onlara kömək etməkdən çox məmnun idim”, deyə Holtsauer qeyd edib.
2. Əylənin
Heyli və Holtsauer kart oyunları oynamağı və zarafat etməyi sevirlər. Onlar gənclik illərindən maraqlı xatirələrini də bölüşüblər: “Görüşlərdə sevgililərimizi dəyişirdik, məktəbdə də yerlərimizi dəyişirdik”.
3. Aktiv qalın
Bacılar fiziki aktivliyi qoruyub saxlayırlar. Onlar mərkəzdə aşağı intensivlikli kardio məşqləri, stul üzərində yoqa və bütün bədən üçün güc məşqləri də daxil olmaqla müxtəlif məşğələlərdə iştirak edirlər.
Heyli bud sümüyünün sınığından sonra ayağının gücünü və hərəkətliliyini bərpa etmək üçün fizioterapevtlə də çalışır.
4. Ailəni prioritet edin
Heylinin üç övladı, 11 nəvəsi və 21 nəticəsi, Holtsauerin isə dörd övladı, 11 nəvəsi və 12 nəticəsi var.
5. İnama söykənin
Əkiz bacılar üçün dini inanc həyatlarının mühüm hissəsidir. Onlar mütəmadi olaraq ibadətlərdə iştirak edib və katolik kilsələrində könüllü fəaliyyət göstəriblər.
Aydın
Şərhlər