Mişel Cotodia Mərkəzi Afrika Respublikasında ötən ilin mart ayında özünü prezident elan etmişdi
Mərkəzi Afrika Respublikasının prezidenti Mişel Cotodia və ölkənin baş naziri Nikolya Tianqey istefa verib. Anspress-in Rusiya mətbuatına istinadən verdiyi məlumata görə, Cotodia Mərkəzi Afrika Respublikasında müsəlman azlıqların nümayəndəsidir və ötən ilin mart ayında özünü prezident elan etmişdi.
O zaman əksəriyyəti müsəlmanlardan təşkil olunan “Seleka” qruplaşmasının döyüşçüləri Cotodianın rəhbərliyi altında hərbi çevriliş edərək MAR-ın paytaxtı Banqini ələ keçirmişdilər. Devrilmiş prezident isə ölkəni tərk etmək məcburiyyətində qalmışdı.
Çevrilişdən sonra ölkədə dini dairələr arasında qanlı toqquşmalar baş vermişdi. BMT-nin hesablamalarına görə, təxminən 600 nəfər həlak olmuş, 159 nəfər isə evlərini tərk etməyə məcbur olmuşdu.
Qeyd edək ki, Mişel Cotodia əksəriyyəti xristian olan ölkədə ilk müsəlman lider olub.
Qaynar.info
