Təmiz azotdan istifadə etməklə ilk ölüm cəzası ABŞ-da həyata keçirilib.
Qaynarinfo xəbər verir ki, bu barədə "Alabama Local News" məlumat yayıb.
1988-ci ildə bir qadını sifarişlə öldürməkdə təqsirli bilinən 58 yaşlı Kennet Smit Alabama ştatının Atmor şəhərində edam edilib. Qubernator Kay İvey deyib ki, o, prosedurdan sonra ölüb.
Qeyd edilir ki, bu edam üsulundan istifadə məhkumun fizioloji xüsusiyyətlərinə görə zəruri olub. 2022-ci ilin noyabrında Smiti standart ABŞ ölümcül inyeksiya ilə edam etmək cəhdi uğursuz olub, çünki iynəni uyğun bir damara daxil etmək mümkün olmayıb.
Edamı həyata keçirmək üçün immobilizasiya edilmiş Smitə təmiz azotla təmin edilmiş maska taxıblar. Bu qaz oksigeni sıxışdıraraq, hipoksiyaya və ölümə səbəb olur. Alabama 2018-ci ildən öldürücü inyeksiya dərmanlarının çatışmazlığı səbəbindən edamlar üçün saf azotdan istifadəyə icazə verib. Lakin Missisipi və Oklahoma bu edam üsulundan hələ də istifadə etməyib.
Alabama rəsmiləri deyirlər ki, bu üsul dünyada istifadə edilən evtanaziya üsullarına bənzəyir. Bununla belə, Smitin vəkilləri iddia edib ki, səlahiyyətlilərin bu şəkildə edam həyata keçirmək üçün lazımi avadanlıqları yoxdur və böyük ölçülü maska kifayət qədər oksigenin keçməsinə imkan yarada və bu, məhkumun əziyyət çəkməsinə səbəb ola bilər. Onlar həmçinin ikinci edama cəhdin "konstitusiyaya zidd sərt cəza" olacağını iddia ediblər. Lakin vəkillərin bütün vəsatətləri apellyasiya məhkəməsi tərəfindən rədd olunub.
Smitin işi ona görə unikaldır ki, jüri ona ömürlük həbs cəzası verilməsi üçün 11 əleyhinə 1 səs verib. Lakin hakim bu qərarı ləğv edib və ona ölüm cəzası verilib.
Aydın
