ABŞ Ukraynanın hər hansı regionunun Rusiya Federasiyasının tərkibinə daxil olacağı təqdirdə bunu tanımayacaq və Moskvaya qarşı yeni sanksiyalar tətbiq edəcək.
Qaynarinfo BBC-yə istinadən xəbər verir ki, bunu Ağ Evin Milli Təhlükəsizlik Şurasının (MTŞ) strateji kommunikasiyalar üzrə koordinatoru Con Kirbi
bildirib.
Onun sözlərinə görə, bu halda ABŞ "müttəfiqləri və tərəfdaşları ilə birlikdə” "tez” və "sərt” reaksiya verəcək.
O, bildirib ki, Rusiya Krıma bənzər "hiylələrə” arxalanaraq Ukraynanın daha çox hissəsini ilhaq etməyi planlaşdırır.
ABŞ Milli Təhlükəsizlik Şurasının sözçüsü Con Kirbi kəşfiyyat agentliklərinə istinadən bildirib ki, hazırda Rusiya bu birləşmə üçün zəmin yaradır.
Onun sözlərinə görə, bu ilin sentyabrında Ukraynanın işğal olunmuş rayonlarında Rusiyaya birləşmək üçün "saxta” referendumlar keçirilə bilər.
Rusiya 2014-cü ildə Krımı Ukraynadan alıb və qeyri-legitim hesab edilən referendumdan sonra öz ərazisinə qatıb.
Kirbi jurnalistlərə deyib: "Biz bunu Amerika xalqına aydınlaşdırmaq istəyirik. Heç kim buna aldanmayacaq. Vladimir Putin 2014-cü ilin hiylələrini təkrar edir”.
O qeyd edib ki, ruslar Rusiyaya birləşmək üçün referendum keçirmək məqsədi ilə qanunsuz olaraq Ukraynanın işğal olunmuş ərazilərinə rusiyapərəst məmurları təyin ediblər.
Rusiya artıq Ukraynanın işğal etdiyi ərazilərdə regional və yerli hakimiyyət orqanlarını təyin edib.
Rusiya 2014-cü ildə seçicilərin Rusiyaya birləşməyə səs verdiyi tələsik referendumdan sonra Krımı ilhaq edib. Həmin referendum bütün dünyada qeyri-qanuni sayılıb.
Kiyev tərəfdarı olan bir çox dövlət bu səsverməni boykot edib.
Ukraynanın digər bölgələrində də oxşar səsvermələr, demək olar ki, oxşar vəziyyətlə nəticələnəcək, Rusiyaya qoşulmağa qarşı olan istənilən müxalifət boğucu atmosferdə böyük ölçüdə aradan qaldırılacaq.
Onun sözlərinə görə, Rusiyanın öz ərazisinə qatmaq istədiyi bölgələrə Xerson, Zaporojya, Donetsk və Luqansk daxildir.
Bir müddət əvvəl ABŞ dövlət katibinin Avropa və Avrasiya məsələləri üzrə köməkçisinin müavini Duqlas Cons bildirmişdi ki, Vaşinqton Rusiyaya qarşı məhdudiyyətləri genişləndirməyi, eləcə də digər ölkələr tərəfindən onlara riayət olunmasına nəzarəti gücləndirməyi planlaşdırır.
M.Arif
