ABŞ Yaxın Şərqdən yüz minlərlə amerikalını təxliyə etməyə hazırlaşır - WP

Qaynarinfo xəbər verir ki, bu barədə ABŞ hökumətinin fövqəladə vəziyyət planları ilə tanış olan rəsmilərə istinadən "The Washington Post” qəzeti yazıb. 

Qəzetin qeyd etdiyi kimi, İsrail Müdafiə Qüvvələri (IDF) oktyabrın 7-də yəhudi dövlətinə hücum edən Fələstin HƏMAS hərəkatının yaraqlılarını məhv etmək üçün Qəzza zolağında quru əməliyyatı hazırladığını elan etdikdən sonra təxliyə ehtiyacı kəskin şəkildə artıb. WP həmsöhbətlərinin fikrincə, indiki vəziyyətdə təkcə İsraildə deyil, həm də qonşu Livanda yaşayan ABŞ vətəndaşları xüsusi narahatlıq doğurur. Bununla belə, onlar vurğulayırlar ki, belə miqyasda evakuasiya ən pis senari hesab olunur. "Ancaq belə bir planın olmaması məsuliyyətsizlik olardı", - məmurlardan biri əlavə edib. 

İsrailə güclü ictimai dəstəyə baxmayaraq, ABŞ prezident administrasiyası mürəkkəb logistika səbəbindən evakuasiya perspektivindən narahatdır, - WP yazır. ABŞ Dövlət Departamentinin hesablamalarına görə, HƏMAS-ın İsrailə hücumu zamanı yəhudi dövlətində təxminən 600 min, Livanda isə 86 min ABŞ vətəndaşı olub. 

Livan Hizbullah hərəkatının HƏMAS-a dəstəyini ifadə etməsindən sonra amerikalıların Livandan çıxarılması zərurəti mühüm məsələyə çevrilib. ABŞ HƏMAS-ın ardınca bu qruplaşmanın yaraqlılarının şimaldan İsrailə hücum edəcəyindən və bununla da ikinci cəbhə yaradacağından ehtiyat edir.

ABŞ səlahiyyətliləri amerikalılar arasında çaxnaşma yaratmaq istəmədikləri üçün evakuasiya planları haqqında açıq danışmağı planlaşdırmırdılar. Bununla belə, son günlər onlar digər oyunçuların hərbi münaqişəyə girməsinin yolverilməzliyini vurğulamaq üçün mövqelərini dəyişiblər, - WP qeyd edir. Nəşrin müsahibə götürdüyü ekspertlərin fikrincə, ABŞ vətəndaşlarının potensial təxliyəsi əvvəlki əməliyyatlardan daha çətin ola bilər. Bunun üçün bölgəyə daha əvvəl gəlmiş Hərbi Hava Qüvvələrinin təyyarələri və ya Hərbi Dəniz Qüvvələrinin döyüş gəmiləri iştirak edə bilər.