ABŞ Hərbi Hava Qüvvələri İspaniyanın cənubunda yerləşən Moron aviabazasını genişləndirməyi və modernləşdirməyi planlaşdırır. Məqsəd strateji B-52 bombardmançılarının bazada yerləşdirilməsi və yanacaqla təmin edilməsi imkanlarını artırmaqdır.

Qaynarinfo xəbər verir ki, bu barədə “The War Zone” məlumat yayıb.

Moron İspaniyaya məxsus aviabazadır və ABŞ tərəfindən ekspedisiya xarakterli döyüş əməliyyatlarının dəstəklənməsi, eləcə də tranzit təyyarələrə xidmət göstərilməsi üçün istifadə olunur.

Tenderlə bağlı ilkin elanda layihənin əsas hissəsi kimi “İspaniyanın Moron şəhərində döyüş təyyarələri üçün dayanacaq sahəsi” göstərilib. Plana aviabazadakı dayanacaq sahəsinin genişləndirilməsi, doqquz yeni silahsız təyyarə dayanacağının və ya döyüş sursatı ilə təchiz edilmiş üç B-52 bombardmançısı üçün yerin yaradılması daxildir.

Silah-sursatla təchiz edilmiş təyyarələrin yerləşdirilməsi xüsusilə mühüm hesab olunur. Belə təyyarələr üçün mümkün partlayış zamanı təhlükəsizliyin təmin edilməsi məqsədilə əlavə məsafə tələb olunur.

ABŞ Hərbi Hava Qüvvələrinin büdcə sənədində qeyd olunur ki, hazırkı dayanacaq sahəsi təhlükəsizlik məhdudiyyətlərinə görə silah-sursatla təchiz edilmiş strateji bombardmançıları qəbul edə bilmir.

Aviabazada hansı dəyişikliklər ediləcək?

Layihə çərçivəsində yeni dayanacaq yerlərindən əlavə, 10 yanacaq doldurma məntəqəsinin və onlarla əlaqəli boru kəmərlərinin inşası nəzərdə tutulur.

Həmçinin hərbi mühəndislər üçün anbar kompleksinin yeri dəyişdiriləcək. Burada yeni qapalı anbar və açıq saxlama sahəsi yaradılacaq. Bundan başqa, dayanacaq sahəsinin kənarları və giriş yolları genişləndiriləcək.

ABŞ Hərbi Hava Qüvvələrinin 2027-ci maliyyə ili üzrə hərbi tikinti sənədlərində layihənin Moron aviabazasının döyüş hazırlığını artırmaq üçün zəruri olduğu bildirilir.

“Strateji bombardmançıların dayanması üçün genişləndirilmiş sahə Moron aviabazasının gələcək missiyaları yerinə yetirmək imkanlarını artıracaq”, deyə sənəddə qeyd edilir.

Layihənin dəyəri 100 milyon dollara çata bilər

Tenderlə bağlı ilkin elana əsasən, layihənin dəyərinin 25–100 milyon dollar arasında olacağı gözlənilir. İşlərin başlanması barədə bildiriş verildikdən sonra layihənin 1038 təqvim günü ərzində başa çatdırılması planlaşdırılır.

Moron aviabazasının yerləşdiyi ərazi ABŞ üçün strateji əhəmiyyət daşıyır. Baza Aralıq dənizi və Yaxın Şərqə yaxın mövqedə yerləşir, geniş dayanacaq sahələrinə, uzun uçuş-enmə zolağına və təyyarələr üçün yanacaq doldurma sistemlərinə malikdir. Ərazidə əlverişli hava şəraitinin olması da onun üstünlükləri sırasında göstərilir.

Moron aviabazasının 496-cı eskadrilyası bildirir ki, obyekt ABŞ-dan şərq istiqamətində həyata keçirilən istənilən əməliyyat üçün mühüm strateji həlqə rolunu oynayır.

Aydın