İspaniya millisinin və “Barselona”nın keçmiş yarımmüdafiəçisi Aleksia Putelyas 2025-2026 mövsümündəki çıxışına görə üçüncü dəfə “Qızıl top” mükafatına layiq görülüb. Futbolçu komandasının dörd titul qazanmasında mühüm rol oynayıb.
Qaynarinfo xəbər verir ki, “Goal” nəşrinin yazdığına görə, Putelyasın bu uğura gedən yolu ağır zədələr və uzunmüddətli bərpa prosesi ilə müşayiət olunub. O, 2022-ci ilin iyulunda Avropa çempionatının başlamasına bir gün qalmış ön çarpaz bağını zədələyib. Bu səbəbdən təxminən 10 ay yaşıl meydanlardan uzaq qalan futbolçu geri döndükdən sonra da əvvəlki formasını bərpa etməkdə çətinlik çəkib. Sonrakı dövrdə əlavə zədələr və menisk əməliyyatı onun çıxışlarına təsir göstərib.
Putelyas üçün dönüş nöqtəsi 2024-cü ildə qadınlar arasında Çempionlar Liqasının finalında yaşanıb. Həmin görüşdə “Barselona”nın “Lion” üzərində qələbəsini möhkəmləndirən qolu vuran yarımmüdafiəçi bu anı özünü yenidən azad hiss etməsinə kömək edən hadisə kimi qiymətləndirib. Onun sözlərinə görə, həmin vaxt zədələrin yaratdığı fiziki və psixoloji çətinlikləri geridə qoyduğunu anlayıb.
2024-2025 mövsümündə Putelyas yüksək oyun səviyyəsinə qayıdaraq 27 qol vurub və 21 məhsuldar ötürmə edib. Buna baxmayaraq, həmin il “Qızıl top” mükafatını komanda yoldaşı Aitana Bonmati qazanıb.
İspaniyalı futbolçu növbəti mövsümdə də uğurlu çıxışını davam etdirib. O, “Barselona”nın heyətində 24 qol vurub, 13 məhsuldar ötürmə edib. Komanda yerli turnirlərdə uğur qazanmaqla yanaşı, Çempionlar Liqasının da qalibi olub. Putelyas həmçinin İspaniya millisinin Millətlər Liqasındakı uğurunda mühüm rol oynayıb.
Məqalədə vurğulanır ki, Putelyasın əhəmiyyəti təkcə fərdi göstəricilərlə ölçülmür. O, komanda yoldaşlarına dəstək verməsi, meydanda liderlik keyfiyyətləri və gənc futbolçuların inkişafına kömək etməsi ilə də seçilir. “Barselona”nın futbolçusu Esmee Brugs onu komanda üzvlərinin ən yaxşı oyunlarını göstərməsinə çalışan nümunəvi lider kimi xarakterizə edib.
Beləliklə, 2021 və 2022-ci illərdə qazandığı mükafatlardan sonra Putelyas üçüncü dəfə qadın futbolunun ən nüfuzlu fərdi mükafatına sahib olub. Məqalənin müəllifi hesab edir ki, futbolçunun ağır zədədən sonra ən yüksək səviyyəyə qayıtması, komanda uğurlarına töhfəsi və mövsüm ərzindəki sabit çıxışı bu nəticəni əsaslandırır.
Aydın
