Səudiyyə Ərəbistanının Kral Abdullah Elm və Texnologiya Universitetinin (KAUST) alimləri okeanda həyatın bu günə qədər aparılan ən böyük DNT tədqiqatının nəticələrini ümumiləşdiriblər.
Qaynarinfo xəbər verir ki, bununla bağlı "Frontiers in Science" (FIS) elmi jurnalında məqalə dərc olunub.
Okean dünyanın ən böyük yaşayış yeri olaraq qalır, lakin onun biomüxtəlifliyinin çox hissəsi hələ də məlum deyil. Tədqiqatçılar əvvəlki dövrlərdə okean həyatının tam atlasının yaradılmasına mane olan maneələri dəf ediblər. DNT sekvensiyası texnologiyasının ortaya çıxması dəniz orqanizmlərinin əksəriyyətini laboratoriyada tədqiq etmək mümkünsüzlüyünü aradan qaldırıb. İndi canlıları müəyyən etmək üçün su və çöküntü nümunələri kifayətdir.
Hesablama gücü və süni intellekt (AI) alətlərinin inkişafı sayəsində elm adamları əldə edilən böyük həcmdə məlumatları tez bir zamanda təhlil edə bilib. Komanda süni intellektdən istifadə edərək müxtəlif dərinliklərdən 2102 nümunənin DNT ardıcıllığını skan edib və 317,5 milyon gen qrupunu müəyyən edib. Bunların yarısından çoxu funksiya və orqanizmin növünə görə təsnif edilə bilər.
"KMAP 1.0 Qlobal Okean Gen Kataloqu dünya üzrə dəniz orqanizmlərindən 317 milyondan çox gen qrupunu ehtiva edən okeanın tam müxtəlifliyini anlamaq üçün bir addımdır. Kataloq okeanın sağlamlığına, Yerin iqliminə və nəticədə insan həyatına əhəmiyyətli dərəcədə təsir edən dəniz mikroblarına həsr olunub", deyə elmi işin aparıcı müəllifi Elisa Lajolo bildirib.
KMAP 1.0 kataloqu artıq su sütununda və okean dibində mikrob aktivliyindəki fərqləri, həmçinin alatoranlıq mezopelagik zonada yaşayan təəccüblü sayda göbələkləri aşkar edib. Bu və digər kəşflər elm adamlarına müxtəlif yaşayış yerlərində yaşayan mikrobların ekosistemləri necə formalaşdırdığını, okean sağlamlığına töhfə verdiyini və iqlimə necə təsir etdiyini anlamağa kömək edəcək.
Aydın
