Almaniyada müxalif Xristian Demokratik Birliyi Partiyasının (XDB) lideri Fridrix Merts Sosial Demokrat Partiyasından (SDP) Olaf Şoltsun rəhbərlik etdiyi hazırkı koalisiya hökumətini əvəz etməyə çalışır.
Qaynarinfo xəbər verir ki, Merts bu barədə DPA-ya müsahibəsində bildirib.
O, XDB-nin tərəfdaşı Xristian Sosial Birliyinin (XSB) lideri Markus Zöderlə koalisiya hökumətini quran partiyalar arasında büdcə mübahisəsini nəzərə alaraq, "bu hökuməti mümkün qədər tez dəyişdirmək istəyi ilə razılaşdıqlarını" söyləyib.
Agentlik qeyd edir ki, Almaniyada artıq iyunun 9-da Avropa Parlamentinə seçkilərlə eyni gündə erkən federal seçkilərin keçirilməsi ehtimal olunur. Lakin bunun üçün Şolts hökumətinin parlamentdə etimadsızlıq səsverməsi elan edilməsi tələb olunur ki, bu da hələ gözlənilmir.
Eyni zamanda, Merts özü bildirir ki, federal və Avropa seçkiləri eyni vaxtda keçirilərsə, Avropa Parlamentinə seçkilər də yüksək seçici fəallığı ilə gücləndirilə bilər.
O, həmçinin Zöderin yeni böyük koalisiya, yəni XDB/XSB və SDP arasında qurulan hökumət təklifinə şübhə ilə yanaşıb. Onun fikrincə, sual ondan ibarətdir ki, bu, özünü marjinallaşdırmaqda davam edən SDP ilə koalisiya üçün riyazi olaraq kifayətdirmi?
O əlavə edib ki, "SDP indi 14%-ə malikdir” və onun sözlərinə görə, "belə bir partiya ilə artıq böyük koalisiya yaratmaq mümkün deyil”.
Xatırladaq ki, Almaniya kanslerinin bəyənmə reytinqi kəskin şəkildə aşağı düşüb: Şolts 26% toplayıb ki, bu da ötən illə müqayisədə 10 faiz bəndi azdır. O, 2022-ci ildə INSA sorğusunun bəyənmə reytinqində 12-ci yerdə qərarlaşıb.
Şolts hökumətinin bir çox digər üzvləri də 2022-ci ildə bəyənmə reytinqləri ilə müqayisədə 5-7 faiz bəndi arasında geriləyib.
Nizami Bağırov
