Yatmazdan bir neçə saat əvvəl şam yeməyi yemək yuxunun keyfiyyətini yaxşılaşdıra və həzm sistemi ilə bağlı narahatlıqların qarşısını ala bilər.
Qaynarinfo-nun "The Independent" nəşrinə istinadən məlumatına görə, son vaxtlar "TikTok" platformasında populyarlaşan "erkən şam yeməyi" (early bird dinner) trendi mütəxəssislər tərəfindən də dəstəklənir. Dietoloqlar və yuxu üzrə həkimlər bildirirlər ki, axşam yeməyinin yuxudan 4-5 saat əvvəl qəbul edilməsi orqanizmin daha rahat istirahət etməsinə şərait yaradır.
Mütəxəssislərin sözlərinə görə, yatmazdan dərhal əvvəl qida qəbul etmək mədə yanması, həzm pozğunluğu və turşu reflüksü riskini artırır. Bu isə insanın gecə ərzində tez-tez oyanmasına və yuxunun keyfiyyətinin aşağı düşməsinə səbəb ola bilər.
"Magnolia Functional Wellness" klinikasının tibbi direktoru, terapevt Fərhan Abdulla bildirib ki, xüsusilə yağlı və ədviyyatlı yeməklərdən sonra dərhal yatmaq həzm sisteminin fəaliyyətini davam etdirməsinə səbəb olur. Bu zaman mədədə turşuluq artır, köp və narahatlıq yarana bilər.
Yuxu təbabəti üzrə mütəxəssis Aleks Dimitriu isə qeyd edib ki, bu, sosial şəbəkələrdə yayılan nadir trendlərdəndir ki, elmi əsaslara söykənir. Onun sözlərinə görə, erkən şam yeməyi zamanı orqanizm gecə saatlarında qidanın həzmi üçün əlavə enerji sərf etmir və nəticədə yuxu daha dərin və fasiləsiz olur.
Dietoloq Culiya Zumpano da bildirib ki, erkən şam yeməyi qan şəkərinin səviyyəsinin yatmazdan əvvəl normallaşmasına imkan verir. Bu isə insanın dolu mədə və ya yüksək qlükoza səviyyəsi ilə yatmasının qarşısını alır.
Ekspertlər vurğulayırlar ki, hər kəsin erkən saatlarda şam yeməyi yemək imkanı olmur. Belə hallarda yeməkdən dərhal sonra uzanmaq əvəzinə 10-20 dəqiqə piyada gəzmək və ya yüngül fiziki fəaliyyətlə məşğul olmaq həzm prosesini sürətləndirə bilər.
Bundan əlavə, yaxşı yuxu üçün axşam saatlarında kofeinli içkilərdən və şəkər tərkibi yüksək olan qidalardan uzaq durmaq tövsiyə edilir. Mütəxəssislərin fikrincə, bu məhsullar yuxuya getməyi çətinləşdirə və gecə istirahətinin keyfiyyətini azalda bilər.
Günay
Şərhlər