Fransanın IFOP şirkətinin araşdırmasına görə, 2000-ci illərin ortalarından 2019-cu ilədək Avropada çimərliklərdə müntəzəm olaraq üstsüz günəşlənən qadınların orta sayı 10 faiz azalıb.
Qaaynarinfo xəbər verir ki, bu barədə “The Olive Press” məlumat yayıb.
Araşdırılan ölkələr arasında İspaniya çimərliklərində üstsüz günəşlənən qadınların illik payı ən yüksək olub və azalma da ən aşağı səviyyədə qeydə alınıb. Bununla belə, burada aydın demoqrafik dəyişiklik müşahidə olunur.
Məlumata görə, üstsüz günəşlənmək İspaniya çimərliklərində 50 yaşdan yuxarı qadınlar arasında hələ də populyar olaraq qalır. Gənc nəsil isə bu praktikadan getdikcə daha az istifadə edir. Bu tendensiya Avropanın digər ölkələrində də müşahidə olunur.
İspan sosioloq, doktor Patrisiya Soley-Beltranın sözlərinə görə, Avropa çimərliklərində üstsüz günəşlənmənin populyarlığının zirvəsi 1980-ci illərə təsadüf edib. Həmin dövrdə bu, azadlığın ifadəsi və özünüifadə vasitəsi kimi qəbul olunurdu.
Lakin gənc nəslin bu yanaşmadan uzaqlaşdığı görünür. Araşdırma bunun bir neçə əsas səbəbinin olduğunu göstərir.
Sorğuda iştirak edən gənc qadınlar çimərlikdə sinələrini açmamaqlarının üç əsas səbəbini göstəriblər. Respondentlərin 50 faizi cinsi zorakılığa məruz qalmaq qorxusunun onları çəkindirdiyini bildirib. 48 faiz kişi tərəfindən arzuolunmaz baxışları və ədəbsiz şərhləri səbəb kimi göstərib.
Üçüncü ən geniş yayılmış səbəb isə şəkillərinin çəkilərək sosial şəbəkələrdə paylaşılması qorxusu olub. Sorğuda iştirak edənlərin 46 faizi bu narahatlığı ifadə edib.
Ekspertlərə görə, bu dəyişiklik gənc nəsil arasında “puritanizm və konservatizm dalğasının” güclənməsi fonunda baş verir. Səyahət və həyat tərzi üzrə ekspert Anabel Vaskes də bu tendensiyaya diqqət çəkib.
Beləliklə, bir vaxtlar azadlıq və özünüifadənin simvolu hesab edilən üstsüz günəşlənmə gənc avropalı qadınlar arasında əvvəlki populyarlığını tədricən itirir.
Aydın
Şərhlər