Estoniya prezidenti Alar Karis bildirib ki, Kaya Kallas baş nazir kimi ərinin sahibkarlıq fəaliyyəti ilə bağlı qalmaqalın mahiyyətini ictimaiyyətə izah etməyə borcludur.
Qaynarinfo xəbər verir ki, o, bu barədə ERR-ə verdiyi qısa müsahibədə
bildirib.
"Bu gün Ukraynanın Müstəqillik Gününü qeyd etdiyimiz üçün bu barədə danışmaq bir az üzücüdür, amma düşünürəm ki, ictimaiyyət baş nazirdən izahat gözləyir. Və bundan sonra o, yəqin ki, özü üçün düşünməli və növbəti addımlarının nə olacağı barədə müşavirləri ilə danışmalı olacaq”, - Karis deyib.
Kaya Kallas qeyd edib ki, o, sahibkar deyil, baş nazirdir, həyat yoldaşı ilə də bizneslə məşğul deyillər və bütün suallar Stark Logisticsə ünvanlanmalıdır.
"Düşünürəm, sözsüz ki, daha çox təfərrüatlar var. Əgər onun sözlərinə görə, o, baş nazirdirsə, bunu izah etməlidir", - Karis şərh edib.
Parlamentin milli müdafiə komissiyasının üzvü Raymonds Kalyulayd çərşənbə günü qeyd edib ki, bu, indi Estoniyaya və onun beynəlxalq nüfuzuna etimad məsələsidir. Karis bu fikirlə razılaşıb.
"Biz görürük ki, Avropada razılaşdığımız sanksiyalar işləməyəndə getdikcə daha çox hadisələr yaşanır. Bu yaxınlarda kənd təsərrüfatı avadanlığının Estoniya ərazisindən daşınması ilə bağlı bir hadisə baş verdi. Bu, ictimaiyyətə açıqlanmalıdır. Əgər biz nəyisə razılaşdırmışıqsa və söhbət sanksiyadan gedirsə, biz onların işlədiyinə əmin olmalıyıq, əks halda özümüzü ələ salmış olarıq”, - prezident əlavə edib.
"Baş nazir bundan sonra nə edəcəyinə özü qərar verməlidir. O və həmkarları bu işi nə dərəcədə ciddi hesab edirlər, onun qərarıdır. Məndə bütün təfərrüatlar yoxdur. Bunun nə dərəcədə ciddi olduğunu bilmirəm. Ona görə dedim. Baş nazirdən indiyə qədər veriləndən daha ətraflı izahat gözləyirəm”, - Karis bildirib.
Qeyd edək ki, Estoniyanın baş naziri Kaya Kallasın əri Arvo Hallikə məxsus olan "Stark Logistics” nəqliyyat şirkətinin Ukraynadakı genişmiqyaslı müharibə zamanı Rusiya istiqamətində fəaliyyətini davam etdirdiyi üzə çıxdıqdan sonra qalmaqal yaşanıb.
Çərşənbə günü günortadan sonra Kallas vəziyyəti açıq şəkildə şərh edərək, ərinin Rusiya Federasiyasındakı müəssisələr arasında biznes müştərilərinin olmadığını bildirib.
"Rusiyanın Ukraynaya təcavüzü davam etdiyi müddətdə Rusiya ilə bütün ticarət və biznesin dayandırılması fikrində qalıram”, - Estoniyanın baş naziri vurğulayıb.
Nizami Bağırov
