Buna səbəb stansiyada aparılan yenidənqurma işləridir.
Nazirlər Kabinetinin 30 dekabr 2012-ci il sərəncamından irəli gələn tələblərin yerinə yetirilməsi və yenidənqurma işlərinin sürətləndirilməsi məqsədilə "28 May” stansiyasında aparılan yenidənqurma işlərinin növbəti mərhələsi çərçivəsində əsas çıxışın bağlanması artıq zərurətə çevrilib.
Bakı Metropoliteninin verdiyi məlumata görə, stansiyanın Cəfər Cabbarlı meydanı istiqamətində olan əsas çıxışı iyulun 1-dən etibarən yenidənqurma işləri başa çatdırılana qədər bağlanacaq.
Qeyd edək ki, Bakı Metropoliteninin 2011-15-ci illərdə inkişafına dair Dövlət Proqramına uyğun olaraq, hazırlanmış tədbirlər planına əsasən, stansiyanın bu hissəsində yeni giriş-çıxış konstruksiyası inşa olunacaq. Bu günə qədər metropoliten rəhbərliyi sərnişinlərin əsas çıxışdan istifadə etməsi üçün müxtəlif tədbirlər görmüşdü. Sərnişinlərin tam təhlükəsizliyi, həmçinin yay aylarında sərnişin axınının nisbətən azalması nəzərə alınaraq, metropoliten rəhbərliyi iyulun 1-dən stansiyanın bağlanması ilə bağlı qərar qəbul edib.
Onu da əlavə edək ki, 1967-ci ildə istifadəyə verilmiş stansiyada bu işlərlə yanaşı, istismar müddətini başa vurmuş və yararsız hala gəlmiş avadanlıqlar da yenilənəcək.
Müvəqqəti narahatlığa görə metropoliten rəhbərliyi sərnişinlərdən üzr istəyir.//ann.az
Qaynar.info
