Rusiya qüvvələri Ukraynanın şərq müdafiəsini yarmağa çalışır. Onların zirehli texnikasının bir kolonnası məntiqin əksinə olaraq Tonenke kəndi yaxınlığındakı açıq ərazidə hücuma keçib, pilotsuz təyyarələr və tank əleyhinə silahlarla vurulub. Geolokasiya videolarında rusların ona yaxın tankı, eləcə də digər zirehli texnikasını itirdiyi görünür.
Qaynarinfo xəbər verir ki, bu barədə CNN
yazıb.
Nəşr qeyd edir ki, Rusiyanın tez-tez mexanikləşdirilmiş yerüstü hücumları qum püskürtməyə bənzəyir - cəbhə xəttinin bir çox nöqtələrində Ukrayna müdafiəsini aşındırır. Müharibələrin Tədqiqi İnstitutundan Yekaterina Stepanenko izah edir ki, Rusiya qarşıdan gələn yay hücum əməliyyatları öncəsi Ukrayna müdafiəsini zəifliklərə görə sınaqdan keçirmək və Ukraynanın müdafiə imkanlarını azaltmaq istəyir.
"Ukraynanın ön cəbhə briqadaları dayanır - müttəfiqlərdən sursat və hava hücumundan müdafiə vasitələrini, yeni səfərbərlik qanununa əsasən, yaş həddi genişləndirən yeni çağırışları gözləyir və ümid edir ki, rus komandirləri səhv etməkdə davam edəcəklər. Onlar az miqdarda artilleriya mərmilərindən (ən azı 5:1 nisbətində) və minlərlə kiçik drondan istifadə edirlər", deyə qeyd edilir.
Ukrayna tərəfi Rusiya sıralarında mənəvi-psixoloji durumun zəif olduğunu iddia edir. Ukrayna Müdafiə Nazirliyinin Baş Kəşfiyyat İdarəsi (GUR) bildirib ki, ruslar cəbhə xəttindən yayınmaq üçün kütləvi şəkildə rüşvət verir, özünə xəsarət yetirir və qaçırlar, çünki bu cür itkilərlə orada sağ qalmaq çətindir. Bununla belə, Britaniya kəşfiyyatının məlumatına görə, Rusiya cəbhə bölgəsindəki qüvvələrini ayda 30 min əsgərlə doldurmağa qadirdir və sənayeləri tanklardan tutmuş pilotsuz təyyarələrə və idarə olunan bombalara qədər hər şeyi istehsal etmək üçün 7/24 işləyir.
Yekaterina Stepanenkonun fikrincə, Ukrayna bəzi döyüş meydanı ssenarilərində bəzi taktiki ərazilərdən imtina etməli və daha müdafiə oluna bilən mövqelərə çəkilməli ola bilər. Rusiyanın döyüş meydanında təşəbbüsü saxlamaq qabiliyyəti Ukrayna qoşunlarını onsuz da az olan texnikanı israf etməyə məcbur edir.
"Lakin ruslar öz səhvlərini təkrarlamağa məhkum deyillər. Onlar uyğunlaşma qabiliyyətini nümayiş etdirdilər, xüsusən də keçən yay Ukrayna hücumunun qarşısını alan çoxqatlı müdafiə sistemlərinin qurulmasında, Ukrayna müdafiəsinin əhatə dairəsindən kənarda kruiz bombalarının yerləşdirilməsində və öz hücum pilotsuz təyyarələri qrupunun yaradılmasında", deyə ekspert qeyd edib.
Nyu-Heyven Universitetinin milli təhlükəsizlik kafedrasının müdiri Metyu Şmidt qeyd edir ki, Qərbin hazırkı dəstəyini nəzərə alaraq Ukrayna Silahlı Qüvvələri üçün ən əlverişli ssenari cəbhə xəttini sabitləşdirmək və saxlamaqdır.
Aydın
