Dubayda mənzillərin bahalaşması 9 illik rekordu qırıb. CBRE-nin hesablamalarına görə, avqust ayında metropolda mənzillərin orta qiyməti illik müqayisədə 20% artıb.
Qaynarinfo xəbər verir ki, 2014-cü ilin noyabrından belə dinamika müşahidə olunmayıb. Birləşmiş Ərəb Əmirliklərinin daşınmaz əmlak bazarı Asiyadan kriptovalyuta milyonerləri və bankirlərin, habelə aktivlərini qorumaq istəyən varlı rusların axını fonunda bərpa olunmağa başlayıb. Bundan əlavə, BƏƏ səlahiyyətliləri frilanserlər üçün viza tətbiq edib.
"Qiymətlərin qalxması artıq bəzi investorları qorxudub", deyə "Golden Brown” şirkətinin xarici daşınmaz əmlak departamentinin nümayəndəsi Dayana Berezovskaya "Kommersant FM” bildirib.
2022-ci ilə qədər bütün dünya statistikasına görə, ölkə lazımi səviyyədə qiymətləndirilməyən bazar sayılırdı. Birinci sahil zolağında qiymət indi beynəlxalq standartlara yüksəlib.
Məsələn, iki il əvvəl "Business Bay" layihəsində bir studiyanı 200-220 min dollara almaq olardı, indi orada 350 min dollardan aşağı variant tapa bilməzsiniz. "Business Bay" Dubayın iş bölgəsidir və burada çoxlu sayda əcnəbi gəlir.
Mənzillərin kirayə verilməsindən orta gəlir illik ən azı 10% təşkil edir. "Emaar Beachfront"da 2022-ci ilin yanvarında bir otaqlı mənzili 550-600 min dollara almaq olardı, indi bu qiymət iki dəfə artıb.
Ruslar Dubayda "Palm Jumeirah", "Emaar Beachfront" və "Jumeirah Beach Residents"də mənzil almağı çox sevirlər. Ailə əraziləri "Damac Hills", "Dubai Hills"dir. Onlar daha mühafizəkardırlar. Məsələn, "Damac Hills"də kiçik bir torpaq sahəsi olan gözəl böyük beş otaqlı mənzil 600-800 min dollara alına bilər.
"Fars körfəzindəki daha prestijli ərazilərin öz çimərlikləri var, "Palm Jumeirah" bunların önündə gəlir. Burada kvadrat metrin orta qiyməti 25 min dollardır. Bu arada, Dubaya gələn və ilkin olaraq, xüsusən də sahilyanı ərazilərdə kvadrat metrə görə o qədər də yüksək olmayan xərclərin arxasınca qaçan investorların bir qədər kənara çıxdığını görünür. Burada başqa alternativlər ortaya çıxır. Məsələn, Abu Dabidə iri developerlər indi yüksək keyfiyyətli, maraqlı layihələr qururlar. Populyar adalar Saadiyat və Yasdır. Məsələn, Saadiyatda premium layihəli bir otaqlı mənzili 650 min dollardan almaq olar, Yas adasında isə analoji lotun qiyməti 350 min dollardan başlayır", deyə Dayana Berezovskaya "Kommersant"a şərhində bildirir.
2023-cü ilin aprelində ruslardan Dubayda daşınmaz əmlakın alınmasına tələb mart ayı ilə müqayisədə demək olar ki, 23% azalıb. Belə məlumatları "Elite & Luxury Real Estate" agentliyi təqdim edib.
Prian.ru portalının baş redaktoru Filip Berezin sözlərinə görə, indi sərmayə marağı Fars körfəzinin qonşu ölkələri və Cənub-Şərqi Asiya ölkələrindəki obyektlərə doğru dəyişib:
"Qiymətlərdə mütləq artım var. Amma mən 10-15% diapazonunda daha təvazökar hesablamalar da görmüşəm. Dənizdən bir neçə kilometr aralıda kiçik mənzil üçün 130-150 min avroluq büdcə hələ də aktualdır. Super-premium seqmentdə dinamika dünyanın digər premium səviyyəli şəhərləri ilə müqayisədə maksimumdur. Məsələn, Avropada belə yerlərdə hər kvadratmetr üçün 10-15 min avro, Dubayda 6-8 min avrodur. Böyümək üçün hələ yer var.
Eyni zamanda, Dubay və ümumilikdə BƏƏ-nin indi hətta regionda da rəqibləri var. Bu Oman və daha az dərəcədə Bəhreyndir. Onlar daha az görünür, lakin biz hələ on minlərlə alıcıdan deyil, ayda yüzlərlə alışdan bəhs etdiyimiz üçün onlar da rol oynayırlar. Üstəlik, Cənub-Şərqi Asiya ölkələri var. Axı, keçən yay Taylandda COVID-19 ilə bağlı bütün məhdudiyyətlər aradan qaldırıldı. Və sadəcə 2022-ci ilin noyabrında başlayan mövsüm orada və İndoneziyada bir qədər az dərəcədə gözəl oldu. İnvestorlar üçün rəqabət artıb, buna baxmayaraq Dubay və bütövlükdə BƏƏ yuxarı qiymət kateqoriyasındadır".
Son bir il ərzində Dubayda mənzil alqı-satqısı üzrə 86 mindən çox əməliyyat qeydə alınıb və bu, bütün müşahidələr tarixində rekord göstəricidir.
Aydın
