Dubaydan Təl-Əvivə uçan “Flydubai” reysi zamanı kapitana hücum edən və KİV-in məlumatına görə, təyyarəyə nəzarəti ələ keçirməyə çalışan pilot, Oman vətəndaşı Həmam əl-Həmmami ola bilər. Onun daha əvvəl “ekstremist baxışlara” malik olması ilə bağlı şübhələr səbəbindən Omanda uçuşlardan uzaqlaşdırıldığı bildirilir.

Qaynarinfo xəbər verir ki, bu barədə CNN və “The Wall Street Journal” məlumat yayıb.

KİV-in, o cümlədən İsrail rəsmisinin məlumatına görə, təyyarənin ikinci pilotu məhz Həmam əl-Həmmami olub. Onun “LinkedIn” profilində "Oman Air" şirkətində çalışdığı, 2025-ci ilin iyunundan 2026-cı ilin yanvarına qədər isə “Royal Air Maroc”da işlədiyi göstərilir.

“The Wall Street Journal”ın mənbəsi iddia edir ki, Oman daha əvvəl əl-Həmmamiyə radikal baxışları ilə bağlı şübhələr səbəbindən uçuşlara qadağa qoyub. Bundan sonra onun “Flydubai” tərəfindən işə götürüldüyü bildirilir.

Sosial şəbəkələrdə “Əl-Qaidə” liderinin fotoları aşkarlanıb

CNN pilotun “LinkedIn” profilini müəyyənləşdirib. Hadisədən təxminən doqquz saat sonra həmin profildə iki paylaşım peyda olub.

Paylaşımlardan birində “Boeing 737 Max” pilot kabinəsindən görüntülər yer alıb. Həmin gün əl-Həmmaminin də məhz bu tip təyyarədə uçduğu bildirilir.

11 oktyabr 2023-cü il tarixli digər paylaşımda isə Dubay Beynəlxalq Hava Limanında İsrailin “El Al” aviaşirkətinə məxsus təyyarənin videosu yerləşdirilib. Videonun sonunda “Əl-Qaidə” terror təşkilatının ikinci lideri Ayman əz-Zəvahirinin, eləcə də 2009-cu ildə özünü partladaraq doqquz nəfərin ölümünə səbəb olan Humam Xəlil Əbu-Mülal əl-Bəlavinin fotoları göstərilib.

KİV həmçinin əl-Həmmaminin digər sosial şəbəkələrdəki paylaşımları barədə məlumat yayıb. Bildirilir ki, həmin paylaşımlar onun dini və qadınlara qarşı ayrı-seçkilik xarakterli baxışlara malik ola biləcəyini göstərib.

Əl-Həmmami Böyük Britaniyadakı Buckinghamshire New University-də təhsil alıb. Nəşrin mənbələrinin məlumatına görə, o, 2023-cü ildə universiteti aviasiya menecmenti ixtisası üzrə bitirib.

Təyyarədəki hücum barədə nə məlumdur?

Hadisə sentyabrın 30-da səhər saatlarında “flydubai”nin Dubaydan Təl-Əvivə uçan reysində baş verib. Təyyarə qaçırılma siqnalı verib və daha sonra Səudiyyə Ərəbistanının Təbuk şəhərindəki hava limanına təcili eniş edib.

KİV-in məlumatına görə, hadisəyə pilotlar arasında baş verən münaqişə səbəb olub. İkinci pilot kapitan Smit Maçhara hücum edib və təyyarəyə nəzarəti ələ keçirməyə çalışıb. Hadisə zamanı təyyarə kəskin şəkildə hündürlük itirib. Daha sonra sərnişinlər və ekipaj üzvləri hücum edəni zərərsizləşdirməyə kömək ediblər.

Hindistan vətəndaşı olan kapitan Maçhar yaralanıb. O, kabinənin qapısını aça bilib və bundan sonra içəri daxil olan şəxslər hücum edəni dayandırmağa kömək ediblər. Pilot daha sonra özü bildirib ki, təyyarədəki bütün sərnişinlər üçün təhlükəni dərk edirdi.

İlkin olaraq pilotların Ukrayna və Rusiya vətəndaşları ola biləcəyi barədə məlumatlar yayılmışdı. Lakin sonradan bu məlumat təkzib edilib. KİV-in məlumatına görə, kapitan Hindistan vətəndaşı, hücum edən şəxs isə Oman vətəndaşı olub.

Hadisə ilə bağlı araşdırma davam edir. İkinci pilotun hərəkətlərinin səbəbləri və mümkün motivlərini hüquq-mühafizə orqanları müəyyən etməlidir.

Aydın