Avropa yaşlı insanların səyahətləri üçün ən yaxşı ölkələr reytinqində üstünlük təşkil edir. Buna turistlər üçün nəqliyyatda endirimlər, yaşlı səyyahlar üçün geniş mədəni və əyləncə imkanları, həmçinin "Mişlen" bələdçisinin ulduzları ilə qiymətləndirilən restoranların çoxluğu səbəb olub.

Qaynarinfo xəbər verir ki, təqaüdə çıxmaq 09:00-dan 17:00-dək davam edən iş rejimi ilə vidalaşmaq demək ola bilər, lakin səyahətlərdən imtina etmək heç də vacib deyil.

Proqnozlara görə, dünyada 65 yaşdan yuxarı insanların sayı 2050-ci ilədək 1,5 milyarda çatacaq. Bununla belə, təqaüdçülər səyahət arzularından əl çəkmirlər. "Booking.com"un araşdırmasına görə, sorğuda iştirak edənlərin ən azı 65 faizi səyahətləri yaşlılıq dövründə həyatdan zövq almağın əla üsulu hesab edir.

Təqaüdə çıxdıqdan sonra dünyanı kəşf etməyə daha çox vaxtı olan insanlar üçün bəzi ölkələr digərlərindən daha əlverişlidir. İsveçrənin "Firebird Tours" turizm şirkətinin mütəxəssisləri "Where Being 60 Beats Being 20: The Best Countries for Retirees in 2026" ("60 yaşında olmağın 20 yaşında olmaqdan daha yaxşı olduğu yerlər: 2026-cı ildə təqaüdçülər üçün ən yaxşı ölkələr") reytinqində məhz bunu araşdırıblar.

Mütəxəssislər yaşlı səyyahları nəzərə alaraq dünyanın 100 ölkəsini təhlil edib və onları yeddi kateqoriya üzrə qiymətləndiriblər. Bunlara 65 yaşdan yuxarı əhalinin payı, yaşlılar üçün endirimlərin əlçatanlığı, piyada gəzintilər üçün əlverişlilik, tibbi xidmətin səviyyəsi, təhlükəsizlik və uyğun mədəni imkanların sayı daxildir.

Avropa bu reytinqdə açıq üstünlüyə malikdir. İlk onluqda səkkiz Avropa ölkəsi yer alıb, ümumilikdə isə 18 Avropa dövləti ilk 25-liyə daxil olub.

Yaşlı turistlər üçün ən yaxşı ölkələr

1. Yaponiya

Birinci yeri Yaponiya tutub. Ölkə muzeylərə giriş və ictimai nəqliyyatda endirimlər, eləcə də piyada gəzintilər üçün əlverişlilik göstəricisinə görə yüksək qiymətləndirilib. 65 yaşdan yuxarı insanların payı da burada ən yüksəkdir – 29,5 faiz.

"Yaponiya sadəcə dünyanın ən yaşlı əhalisinə malik deyil – ölkə cəmiyyətini onun ətrafında qurub", – turizm ekspertləri bildiriblər.

Nəticədə ölkə yaşlı səyyahlar üçün demək olar ki, hər addımda əlavə üstünlüklər təqdim edir. Məsələn, Asiyanın ən çox ziyarət edilən muzeylərindən biri olan Tokio Milli Muzeyinə 70 yaşdan yuxarı şəxslər bütün il ərzində pulsuz daxil ola bilərlər.

2. Almaniya

İlk beşlikdəki digər dörd ölkənin hamısı Avropadadır. Almaniya ikinci, İspaniya üçüncü, Sloveniya dördüncü, İsveçrə isə beşinci yeri tutub.

Almaniya 65 yaşdan yuxarı əhalinin payına görə Avropa reytinqində liderdir – 23,7 faiz. Ölkədə "BahnCard" proqramı çərçivəsində yaşlı sərnişinlər üçün ictimai nəqliyyatda 70 faizə qədər endirimlər də təklif olunur.

Bundan əlavə, Almaniyada UNESCO-nun Dünya İrsi siyahısına daxil edilmiş 54 obyekt və "Mişlen" ulduzu ilə qiymətləndirilən 336 restoran yerləşir. Yaşlı səyyahlar bu məkanlarda yerli mədəniyyət və mətbəxlə tanış ola bilərlər.

3. İspaniya

İspaniyanın paytaxtı Madrid piyada gəzintilər üçün əlverişlilik baxımından maksimum qiymət alıb. Ölkənin səhiyyə sistemi isə dünyada 15-ci yerdə qərarlaşıb.

Yaşlı turistlər Prado Muzeyinə giriş üçün 50 faizlik endirimdən də yararlana bilərlər. Bundan başqa, İspaniyada UNESCO-nun Dünya İrsi siyahısında 50 obyekt var.

Lakin bir məhdudiyyət mövcuddur: yaşlı insanlar üçün ictimai nəqliyyatda endirim yalnız ölkə sakinlərinə şamil edilir.

4. Sloveniya

"Firebird Tours"un məlumatına görə, Sloveniyanın dördüncü yeri "heç kimin gözləmədiyi nəticə və reytinqin ən maraqlı hekayəsi" olub. Ölkə İsveçrə, Fransa və İtaliya kimi məşhur turizm istiqamətlərini qabaqlayıb.

Sloveniya ingilisdilli mediada ən məşhur turizm istiqamətlərindən biri olmasa da, Qlobal Sülh İndeksində üçüncü yerdə qərarlaşıb. Bu da onu səyahət üçün ən təhlükəsiz ölkələrdən birinə çevirir.

Yaşlı turistlər Avropa İttifaqından gələn ziyarətçilər üçün əlçatan olan ictimai nəqliyyatda 50 faizlik endirimdən yararlana bilərlər. Milli Müasir Tarix Muzeyinə girişdə isə təxminən 27 faizlik endirim əldə etmək mümkündür.

5. İsveçrə

İsveçrə reytinqə turistlər üçün "GA TravelCard" vasitəsilə ictimai nəqliyyatda təqdim edilən 50 faizlik endirim sayəsində daxil olub.

Şirniyyat sevən yaşlı səyyahlar Sürixdəki "Lindt" Şokolad Muzeyində ilboyu təqaüdçülər üçün nəzərdə tutulan endirimdən yararlana bilərlər. Piyada gəzintilər üçün maksimum qiymət alan ölkədə şokoladdan alınan əlavə kaloriləri gəzinti zamanı asanlıqla yandırmaq da mümkündür.

Yaşlı turistlər üçün nəqliyyat endirimlərində ilk səkkiz yeri demək olar ki, tamamilə Avropa ölkələri tutub. Yeganə istisna yeddinci yerdə qərarlaşan Kanada olub.

Fransa ümumi reytinqdə yalnız 24-cü yeri tutsa da, "Mişlen" bələdçisinin ulduzları ilə qiymətləndirilən restoranların sayına görə lider olub. Səyyahlar belə 641 restoran arasından seçim edə bilərlər.

Yaşlı turistlər üçün ölkələrin ümumi reytinqi:

1. Yaponiya

2. Almaniya

3. İspaniya

4. Sloveniya

5. İsveçrə

6. Avstriya

7. Danimarka

8. Finlandiya

9. Niderland

10. Kanada

11. İtaliya