"Eurohome” ticarət mərkəzinin dövlətə külli miqdarda vergi borcu üzə çıxıb.
Qaynarinfo-nun araşdırmasına görə, "Eurohome”un İqtisadiyyat Nazirliyi yanında Dövlət Vergi Xidmətinin Bakı şəhəri Kiçik Sahibkarlıqla İş üzrə Baş İdarəsinə 1 milyon 286 min 820 manat 76 qəpik vergi borcu yaranıb.
Nizamnamə kapitalı 306 min 548 manat olan "Eurohome"un qanuni təmsilçi, tikinti materialları bazarının direktoru Samir Məmmədovdur. "EuroHome” tikinti materialları bazarının sahibi biznesmen Azay Möhnətovdur.
Qeyd edək ki, bu gün Fövqəladə Hallar Nazirliyinin Dövlət Yanğın Nəzarəti Xidməti yanğın təhlükəsizliyinin təmin edilməsi məqsədilə Bakı şəhəri, Nərimanov rayonu, Təbriz küçəsi, ev 2 ünvanında yerləşən "Eurohome” tikinti materiallarının satışı mərkəzində işlərin və xidmətlərin göstərilməsinin qismən dayandırılması barədə qərar qəbul olunub.
Qərarda deyilir:
Dövlət Yanğın Nəzarəti Xidməti tərəfindən Bakı şəhəri, Nərimanov rayonu, Təbriz küçəsi, ev 2 ünvanında yerləşən "Eurohome” tikinti materiallarının satışı mərkəzində yoxlama zamanı yanğın təhlükəsizliyi sahəsində çoxsaylı nöqsanların mövcud olduğu, həmin nöqsanların insan həyatı və ya sağlamlığına, ətraf mühitə və dövlətin əmlak maraqlarına birbaşa təhlükə yaratdığı müəyyən edilib. Belə ki:
- mərkəzin ərazisində hazırda Dövlət Yanğın Nəzarəti Xidməti tərəfindən istismara qəbul olunmadan 30 obyekt fəaliyyət göstərir;
- yanğın su hovuzu inşa edilməyib və hidrantlar quraşdırılmayıb, mövcud müvəqqəti quraşdırılmış yerüstü su çənindən yanğın avtomobillərinin su götürməsi qeyri-mümkündür;
- mərkəzin ərazisində fəaliyyət göstərən obyektlərdə elektrik naqilləri yanar materialların üzərindən çəkilib, avtomatik yanğın xəbərverici siqnalizasiya qurğuları quraşdırılmayıb;
- mərkəz ilkin yanğınsöndürmə vasitələri və odsöndürən balonlarla tam təmin olunmayıb;
- mərkəzin tikintisi üçün layihə sənədləri Dövlət Yanğın Nəzarəti Xidməti ilə razılaşdırılmayıb;
- obyektlərdə olan insanları yanğın hadisəsi haqqında xəbərdar etmək üçün xəbərverici qurğular quraşdırılmayıb.
Beləliklə, mövcud vəziyyətdə obyektin istismarının davam etdirilməsi orada hər an baş verə biləcək yanğının qısa müddətdə genişlənərək faciəni qaçılmaz edəcəkdir.
Qeyd olunanları nəzərə alaraq, yanğın təhlükəsizliyi norma və qaydalarının pozulması səbəbindən baş verə biləcək yanğın hadisələrindən insanların həyatının və sağlamlığının, dövlətin əmlak maraqlarının, milli sərvətin, ətraf mühitin, bütün mülkiyyət növlərinin qorunması məqsədilə, "Yanğın təhlükəsizliyi haqqında” Azərbaycan Respublikası Qanununun 25-ci maddəsinin 9-cu bəndini, "Sahibkarlıq sahəsində aparılan yoxlamaların tənzimlənməsi və sahibkarların maraqlarının müdafiəsi haqqında” Azərbaycan Respublikası Qanununun 28-ci maddəsini, eləcə də "Azərbaycan Respublikası Fövqəladə Hallar Nazirliyi Dövlət Yanğın Nəzarəti Xidməti haqqında Əsasnamə”nin 9.7-ci bəndinin tələblərini rəhbər tutaraq, yanğın təhlükəsizliyi norma və qaydalarının tələblərinin pozulması faktları aşkar edilmiş Bakı şəhəri, Nərimanov rayonu, Təbriz küçəsi, ev 2 ünvanında yerləşən "Eurohome” tikinti materiallarının satışı mərkəzində işlərin və xidmətlərin göstərilməsinin qismən dayandırılması barədə Qərar qəbul olunub.
Əhməd
