Rusiya ordusunun generalı Sergey Surovikin ötən həftə muzdluların uğursuz üsyanından sonra Kremlin "Vaqner" tərəfdarlarına qarşı sərt tədbirləri zamanı saxlanılıb.
Qaynarinfo xəbər verir ki, bu barədə "The Financial Times”
yazıb.
İddiaya görə, "Vaqner”in lideri Yevgeni Priqojinlə yaxşı münasibətdə olduğu bilinən yüksək rütbəli rus generalı Surovikin bir neçə gün ortada görünməyib və məsələdən xəbəri olan 3 nəfərin sözlərinə görə, o, saxlanılıb.
Rusiya Hərbi Hava Qüvvələrinin rəhbəri Surovikinin Priqojinin başçılıq etdiyi üsyanı planlaşdırmaqda ittiham olunduğu, yoxsa sadəcə olaraq dindirilmək üçün saxlandığı bəlli deyil.
Moskva elitası deyir ki, Vladimir Putin Rusiyada son 30 ildə ilk çevriliş cəhdindən sonra etirazları yatırtmaq, asayişi bərpa etmək və hakimiyyətinin vahidliyini bərpa etmək məqsədiilə kəşfiyyat xidmətlərinin zirvəsində təmizləməyə başlayıb.
"Vaqner"ə rəğbət bəsləyən və nizami hərbi qüvvələri tənqid edən bir çox sərt xətt tərəfdarları son günlər gözdən itib, Priqojinin çevrilişlə devirməyə ümid etdiyi müdafiə naziri Sergey Şoyqu kimi sadiq şəxslərə platforma verilib, o, yüksək səviyyəli görüş və tədbirlərdə iştirak edərək ictimaiyyət qarşısına çıxır.
"Putin Priqojinin üsyan planları haqqında bizim anladığımız kimi əvvəlcədən bilirdi və buna görə də müəyyən qədər hazırlaşa bilib. O, həmin gün kimin nə etdiyini görə bildi. İndi isə təmizlik işləri aparır", deyə Qərb hökumətinin nümayəndəsi bildirib.
Surovikinin saxlandığına inandıqlarını deyən rəsmi, "Biz başa düşürük ki, onun ardınca başqa adamlar da gedəcək".
Suriyada amansız bombardman taktikasına görə "General Armageddon" kimi tanınan Surovikin ötən ilin payızında Rusiyanın Ukraynaya müharibəsinə rəhbərlik etmək üçün irəli çəkilib. O, tez bir zamanda aşağ pilləyə düşsə də, Rusiyanın daha sərt müharibə tərəfdarı icması arasında favorit olaraq qalır və bu yaz Ukraynanın şərqində cəbhə xəttində döyüşən "Vaqner" hərbiləşdirilmiş qrupunun kuratoru kimi fəaliyyətə başlayıb.
Priqojinin Moskvadakı hərbi qurumla münaqişəsi kəskinləşdikcə, Surovikinin vasitəçi kimi çıxış etdiyi güman edilir. Münaqişə cümə günü axşam Moskvanın müdafiə elitasına qarşı silahlı üsyana çevrildikdə, Surovikin "Vaqner" döyüşçülərini silahlarını yerə qoymağa çağıran qısa bir bəyanat yayıb və sonra yoxa çıxıb.
"O, evdə deyil. Onunla heç bir əlaqə yoxdur", deyə məsələ ilə tanış olan şəxslərdən biri FT-yə deyib.
Rusiyalı jurnalist Aleksiy Venediktov çərşənbə günü bildirib ki, Surovikinin "üç gündür ailəsi ilə əlaqəsi yoxdur. Onun mühafizəçiləri də cavab vermir".
Surovikinə dair şübhələrə onun Priqojinlə yaxşı münasibəti səbəb ola bilərdi. "Vaqner" lideri digər generallara və müdafiə elitasına qarşı sərt sözlər söyləyərək, onları işğal zamanı rus əsgərləri arasında çoxlu ölüm hallarında günahlandırarkən və onları "soyqırım”da ittiham edərkən, Surovikinlə dialoqu davam edirdi.
Surovikin həmçinin Müdafiə Nazirliyinin yüksək rütbəli rəhbərliyi ilə taktika və strategiya üzərində toqquşub və bu, Putinin cəmi bir neçə ay sonra onun vəzifəsini kiçiltməsi ilə nəticələnib. Əvəzində Putin Valeri Gerasimovu yenidən komandan təyin edib.
Cümə axşamı Kreml Surovikinlə bağlı hər hansı suala cavab verməkdən imtina edib və jurnalistlərə Müdafiə Nazirliyinə müraciət etməyi məsləhət görüb.
Çərşənbə günü Kremlin rəsmi nümayəndəsi Dmitri Peskov "New York Times" qəzetinin ABŞ rəsmilərinə istinadən generalın çevriliş planı barədə əvvəlcədən bildiyi barədə xəbərini təkzib edib. Peskov "bu hadisələrlə bağlı çoxlu spekulyasiyalar" gözlədiyini deyib və əlavə edib: "Məncə, bu, buna bir nümunədir".
Aydın
