Ukrayna ordusu Baxmutun cinahlarına hücuma keçib və şəhərin azad edilməsi üçün "hər cür şərait” yaradıb.
Qaynarinfo xəbər verir ki, bu barədə Ukrayna Silahlı Qüvvələrinin Quru Qoşunlarının komandanı, general-polkovnik Aleksandr Sırski BBC-yə müsahibəsində
bildirib.
"Hazırda bu şəhəri geri qaytarmaq üçün bizə hər cür şərait yaradılıb”, - deyə o bildirib. Generalın sözlərinə görə, Rusiya qoşunları yarımmühasirədədir.
Sırski izah edir ki, Baxmutu prinsipiallıqdan azad etmək istəyir. "Bu, prinsip məsələsidir, şərəf məsələsidir. Çünki biz Baxmutu müdafiə edərkən çoxlu qardaşlarımızı, çoxlu hərbçilərimizi itirdik”, - deyə USQ-nin Quru Qoşunlarının komandanı bildirib.
Quru Qoşunlarının rəhbəri Baxmutun strateji baxımdan mühüm şəhər olmaması ilə bağlı deyilənlərlə razılaşmayıb. General qeyd edib ki, oradan Debaltsevo, Slavyansk, Qorlovka, Konstantinovka və Severskdən yollar keçir.
"Bu, bütün bu yolların birləşdiyi mərkəzdir. İnkişaf etmiş yollar şəbəkəsindən istifadə edərək, Rusiya qoşunları bu əməliyyat istiqamətlərindən ən azı üçündə irəliləyə bilər", - Sırski əlavə edib.
Bundan əlavə, Sirskinin fikrincə, Baxmut yaxınlığındakı ərazilər "ətrafdakı ərazinin çox hissəsini idarə etməyə imkan verən müxtəlif növ dominant yüksəkliklərin cəmləşməsidir”. Bu, Baxmutu gələcək irəliləyişlər üçün mühüm tramplin edir, - Sırski qeyd edib.
O, həmçinin bildirib ki, "Vaqner” "dəhşətli itkilər” verərək, şəhərə "tam heyətlə girmək” qərarına gəldikdə səhv edib. "Əslində, onlar döyüş qabiliyyətini itiriblər. İndi Ukrayna Silahlı Qüvvələrinin onu "on dəfələrlə az itki ilə” geri qaytarmaq imkanı var”, - deyə general əlavə edib.
Xatırladaq ki, "Vaqner” özəl hərbi şirkətinin döyüşçüləri mayın sonunda Baxmutu ələ keçiriblər, bundan sonra mövqelərini Müdafiə Nazirliyinin hərbi qulluqçularına təhvil verərək səhra düşərgələrinə geri çəkiliblər. "Vaqner”in rəhbəri Yevgeni Priqojin bildirib ki, şəhərin ələ keçirilməsi zamanı 10 min muzdlu ölüb.
Nizami Bağırov
Şərhlər