Arizona Dövlət Universitetinin amerikalı alimləri hesab edirlər ki, asteroid (33) Polymnia-da dövri cədvəldə olmayan elementlər ola bilər.
Qaynarinfo xəbər verir ki, bu barədə məqalə "European Physical Journal Plus" (TEPJP) elmi jurnalında dərc olunub.
Asteroid (33) Polymnia Mars və Yupiter arasındakı əsas asteroid qurşağında, Yerdən 448 milyon kilometr məsafədə yerləşir. Onun diametri 55 kilometrdir.
Astronomların fikrincə, cismin həddindən artıq yüksək sıxlığı Yerdə tapılan ən ağır element olan osmiumdan daha ağır olan xüsusi süxurların mövcudluğundan xəbər verə bilər. Eyni zamanda, göy cisminin özündə mineralları super sıx formalara sıxışdırmaq üçün kifayət qədər kütlə yoxdur.
Nəticələrə çatmaq üçün tədqiqatçılar Thomas-Fermi modeli kimi tanınan atomun xam modelindən istifadə edərək hipotetik fövqəlağır elementlərin atom quruluşunu nəzəriyyə ediblər. Onlar müəyyənləşdirib ki, atom nömrələri 164 ətrafında olan elementlərin sıxlığı kub santimetr üçün 36 ilə 68,4 qram arasında olacaq. Bu diapazon Polymnia-da hər kub santimetr üçün təxmin edilən 75,28 qram sıxlığa yaxındır.
Alimlərin kəşfi sabit fövqəlağır elementlərin mövcudluğu ehtimalını təsdiqləyir. Belə xüsusiyyətlərə malik elmə məlum olan maddələr çox radioaktivdir və atomlarının nüvələrindəki çoxlu sayda protonun itməsi nəticəsində millisaniyələrdə parçalanır.
"Bəzi fövqəlağır elementlərin sabit ola biləcəyi və Günəş sistemimizdə tapılması fikri çox həyəcanvericidir", deyə tədqiqatın həmmüəllifi və fizika professoru İohann Rafelski bildirib.
Polymnia asteroidinin xüsusiyyətlərinin başqa mümkün izahı onun tərkibindəki qaranlıq maddə ola bilər.
Aydın
