İnsanları məqsədli şəkildə ovlayan heyvanlar hansılardır?

Qaynarinfo xəbər verir ki,  iflscience.com portalı hücum statistikasını təhlil edərək insanları qanuni ov hesab edən ən təhlükəli üç yırtıcı növü müəyyən edib.

Şirlərin insanları fəal şəkildə ovladığını sübut edən çoxsaylı faktlar və məlumatlar mövcuddur. 2015-ci ildə Cənubi Afrikada safari zamanı bir qadın avtomobilin pəncərəsindən şir tərəfindən sürüklənərək öldürülüb. Tanzaniyada hər il şirlər təxminən 50 nəfəri öldürür, qurbanların əksəriyyəti gecə vaxtı evə qayıdan gənc kişilər olur. 1990–2004-cü illər arasında ölkədə 563 ölüm halı qeydə alınıb. Qeyd olunur ki, Tanzaniya Afrikada ən böyük şir populyasiyasına malik ölkədir.

"Cənubi Tanzaniya, görünür, insan yeyən şirlər üçün əsas mərkəzdir”, deyə BBC-yə müsahibəsində ekoloq-bioloq Emi Dikman bildirib.

Ağ ayıların insanlara hücumu olduqca nadir hallarda baş verir, lakin tamamilə istisna da deyil. 2023-cü ildə Alyaskadakı kəndlərdən birində ağ ayı bir qadını və onun oğlunu öldürüb. 2024-cü ildə isə Kanadanın şimalında yerləşən Brevort adasında iki ağ ayı bir işçini öldürüb.

2017-ci ildə aparılmış araşdırmaya əsasən, 1870–2014-cü illər arasında Kanada, Qrenlandiya, Norveç, Rusiya və ABŞ-də ağ ayıların iştirakı ilə 73 hücum qeydə alınıb. Bu hadisələr nəticəsində 20 nəfər həlak olub, 63 nəfər isə xəsarət alıb. Hücumların 20 faizi 2010–2014-cü illər dövrünə təsadüf edib. Hesabatda qeyd olunur ki, insanlar üçün ən böyük təhlükə qida çatışmazlığı səbəbindən stress yaşayan yetkin erkək ağ ayılar olub. İnsanları ov kimi görmək nadir haldır, lakin qida qıtlığı zamanı mümkün və son dərəcə təhlükəli ssenaridir.

Hazırda timsahların 26 tanınmış növü mövcuddur və onlardan yalnız səkkizi insanların ovlanması ilə əlaqələndirilir. İnsanlara edilən hücumların illik dəqiq statistikası yoxdur. Bunun səbəbi isə bu sürünənlərin çox vaxt ucqar və nəzarətsiz ərazilərdə yaşamasıdır, nəticədə bir çox hadisə qeydə alınmır.

Şirlər və ağ ayılar bəzən insanları məqsədli şəkildə ovlayan heyvanlar kimi qiymətləndirilsə də, timsahlarla bağlı məlumatlar daha çox insanın səhv vaxtda və səhv yerdə olması ilə izah olunur.

Dəniz və Nil timsahları insanlara hücumları ilə ən çox gündəmə gələn növlərdir. Bildirilir ki, Osama adlı bir timsah Uqandada Viktoriya gölü ətrafında azı 83 insanı yeyib. Uzunluğu təxminən 5 metr olan bu timsahın insanları ovlamaq üçün qayıqları aşırdığına dair məlumatlar da mövcuddur.