Dünya 17:00 25.01.2023

İspaniya Ukrayna səfirliyinə partlayıcı göndərməkdə şübhəli bilinən təqaüdçünü saxladı

İspaniyada Ukrayna səfirliyi də daxil olmaqla, pirotexniki materiallarla məktublar göndərməkdə şübhəli bilinən şəxs saxlanılıb.

Qaynarinfo xəbər verir ki, bu barədə "El Pais” nəşri yazır.

Nəşrin məlumatına görə, polis əməkdaşları Burqos əyalətinin Miranda de Ebro bələdiyyəsində 74 yaşlı kişini noyabrın sonu və dekabrın əvvəllərində antiterror xəbərdarlığına səbəb olan pirotexniki materialların olduğu altı məktubun müəllifi kimi həbs ediblər.

Məktub alanlar arasında İspaniyanın baş naziri Pedro Sançes və Madriddəki Ukrayna və ABŞ səfirlikləri də var.

Mətbuatda yayılan məlumata görə, həbs edilən İspaniya vətəndaşı olan şəxs təkbaşına hərəkət edib və heç bir qruplaşma ilə əlaqəsi olmayıb. İndi polis onun Burqosdakı yaşayış yerində axtarış aparır.

"La Sexta” nəşri məlumat verir ki, saxlanılan şəxs Miranda de Ebro yaxınlığındakı Vitoriya şəhər şurasının məmuru işləyib və hazırda tək yaşayır, onun hər hansı siyasi qrupa mənsubluğu barədə heç nə məlum deyil.

Poçt xidmətində göndərişləri izləmə sistemi olmadığından polis ənənəvi üsula əl atıb. Onlar paketlərin göndərildiyi poçt şöbələrindən kamera görüntülərini toplayıblar. Paketləri görüntülərdə tapıblar və bu məlumatla (baş verən tarix və saat) onları Kastiliya və Leona (Valyadolid və Burqos) aparan marşrutu yenidən qurmağa çalışıblar.

Zərflər göndərişin ən xarakterik elementi olub, çünki onlar adi zərflər deyil, çox xüsusi xüsusiyyətlərə malik idilər. Bunlar 20x15 zərflərdir, lakin çox xüsusi kəsiklə. Polis internet vasitəsilə bu zərfləri yayan şirkəti tapmağa müvəffəq olub. Polis İspaniyanın müxtəlif əyalətlərindəki bütün alıcıları növbə ilə yoxlayıb və alıcını Burqosda tapıb.

Artıq diqqəti həmin şəxsə cəmləyən polis müəyyən edib ki, o, həmçinin internetdən bomba paketlərində olan yubiley nəşri markaları və digər materialları alıb. Bütün bu sübutlar polisin məktubların göndərilməsinə görə hazırda saxlanılan şəxsin məsuliyyət daşıdığı qənaətinə gəlib.

Dekabrda bildirilib ki, polisin məlumatına görə, ölkənin şimalındakı Valyadolid şəhərindən 6 paket partlayıcı göndərilib. Burqosdan təxminən 130 km məsafədə.

Bağlamaların əksəriyyəti zərərsizləşdirilib, Ukrayna səfirliyinin əməkdaşı isə bağlamanın içini yoxlayarkən yüngül xəsarət alıb.

Bundan sonra Ukraynanın İspaniya da daxil olmaqla 12 ölkədəki səfirliklərinə təhdid məktubları daxil olub və Ukrayna Xarici İşlər Nazirliyi bunu "düzgün planlaşdırılmış terror kampaniyası” adlandırıb.

Nizami Bağırov