Qaynarinfo xəbər verir ki, "The Telegraph"ın yazdığına görə, dünyanın müxtəlif yerlərində baş verən gözlənilməz təbiət hadisələri turistlərin uzun müddət əvvəl planlaşdırdığı məzuniyyəti tamamilə alt-üst edə bilər.

İspaniya - dəniz ilbizləri

2025-ci ilin avqustunda Kosta-Blanka sahillərindəki Qvardamar-del-Sequra şəhərində turistlərə çimərliyə girmək qadağan edilib. Səbəb "mavi əjdahalar" adlanan dəniz ilbizləridir. Gözəl görünüşlərinə baxmayaraq, onlar olduqca təhlükəlidir: zəhərli canlılarla qidalanaraq özlərini müdafiə üçün toksin toplayırlar. Onların sancması həyati təhlükəli allergiyaya səbəb ola bilər.

Kariblər - Sarqasum mövsümü

Yayda adalara çürüyən yosun dalğası yaxınlaşır. Sarqasum kəskin, xoşagəlməz qoxu yayır. 2025-ci ildə yosunların həcmi 2022-ci ilin rekord göstəricisini ikiqat üstələyib.

ABŞ - Dereço tufanları

Tornadodan daha az proqnozlaşdırıla bilən, amma çox təhlükəli olan bu fırtınalar 400 kilometrdən çox məsafə qət etməli, külək sürəti isə 120 km/saata çatmalıdır. Əsasən aprel–avqust aylarında mərkəzi və şərqi ştatlarda müşahidə olunur.

Yunanıstan - Brizlər küləkləri

İyun–sentyabr aylarında Kiklad adalarında əsən güclü şimal küləkləri dənizi təhlükəli dalğalara çevirir və bərələrin hərəkətini poza bilir. Yerli sakinlər səhər və axşam saatlarında dənizə çıxmağa üstünlük verirlər.

Yaponiya - Tayfun mövsümü

Avqust və sentyabrda tayfunlar adətən Okinavanı zərbə altına alır, lakin təsirləri Tokiyoya qədər çatır. Küləklərin sürəti 200 km/saata çata bilir.

Böyük Britaniya - Uçan qarışqa günü

İyun–sentyabr arasında bir neçə gün ərzində minlərlə qanadlı qarışqa havaya qalxaraq kütləvi sürətdə cütləşir. Bu, böyük "hava buludları" yaradır.

İtaliya - Aqua alta (Venesiyada yüksək su)

Noyabr–mart aylarında Venesiyada güclü sular küçələri basır. 2019-cu ildə şəhərin 80 faizi su altında qalmışdı.

Norveç - Qütb gecəsi (Şpisbergen)

Noyabrın ortasından günəş üfüqdən qalxmır. Bu müddətdə yalnız fənərlə gəzmək mümkündür, turistlər isə əsasən şimal işığını görmək üçün gəlirlər.

Fransa - Mistral küləkləri

Rona vadisindən Aralıq dənizinə doğru əsən soyuq və quru küləklər 100 km/saata qədər sürət yığır, yanğınlara səbəb ola və aviareysləri poza bilər.

Avstraliya - Qutu meduzaları mövsümü

Noyabr–may aylarında Kvinslendin şimal sularında görünən bu meduzaların zəhəri ürəyi dayandıra bilər. Turistlərə qoruyucu geyimlərlə yalnız nəzarət olunan çimərliklərdə üzmək tövsiyə olunur.

Tailand - Tarlaların yandırılması

Mart ayında Çianqmay ətrafında fermerlər torpağı yeni əkinə hazırlamaq üçün sahələri yandırırlar. Nəticədə tüstü aylarla qalır, şəhərdə havanın çirklənməsi baş ağrısı və tənəffüs problemlərinə səbəb olur.

Aydın