Almaniyanın müdafiə şirkətləri "Rheinmetall" və "MBDA Germany" 2026-cı ilin əvvəlində gəmi lazer silah sistemlərinin hazırlanması və istehsalı üçün birgə müəssisə yaratmağı planlaşdırırlar.

Qaynarinfo "Interesting Engineering"ə istinadən xəbər verir ki, bu, Almaniya Hərbi Dəniz Qüvvələri (Deutsche Marine) üçün pilotsuz uçuş aparatları və digər manevr edən təhdidlərə qarşı kiçik məsafələrdə mübarizə aparmaq baxımından yeni imkan deməkdir.

Şirkətlər bildirirlər ki, gələcək birgə müəssisə 2019-cu ildən davam edən əməkdaşlığa və Almaniya donanmasının döyüş gəmisinə inteqrasiya edilmiş lazer demonstratorunun uğurlu sınaqlarına əsaslanacaq. Sistem bir il ərzində real dəniz şəraitində fəaliyyət göstərib.

İlkin mərhələdə, KİV-in yazdığına görə, yeni struktur donanmanı ənənəvi gəmi toplarını və idarə olunan raketləri tamamlayacaq tam funksional lazer döyüş sistemləri ilə təmin etməyə fokuslanacaq.

Məlumata görə, lazer sistemi qısa və çox qısa məsafələrdə kiçik ölçülü və yüksək sürətli hava hədəflərini məhv etmək üçün nəzərdə tutulub. Bu isə pilotsuz aparatların kütləvi istifadəsi fonunda getdikcə daha актуal problemə çevrilir. Lazer silahları son dərəcə dəqiq nişanalma, minimal yan zədələr və adi döyüş sursatlarına olan ehtiyacın azalması ilə fərqlənir.

Vurğulanır ki, demonstrator artıq genişmiqyaslı dəniz sınaqları zamanı effektivliyini sübut edib. Bu sınaqlara müxtəlif növ hədəflər üzrə 100-dən çox izləmə və atış testi daxil olub. Xüsusilə "təmiz səma” adlandırılan sınaqlar keçirilib — bu zaman lazer şüası sabitləşmə üçün ərazi fonuna söykənmədən hədəfi izləyir və məhv edir.

İstehsalçılar bildirirlər ki, sistem böyük məsafələrdə olduqca kiçik obyektləri — məsələn, bir avro sikkəsi ölçüsündə hədəfi — stabil şəkildə müşayiət edə bilib. Lazer enerjini dəqiq şəkildə hədəfə fokuslayaraq yayınma riskini azaldıb və gəminin yellənməsi, atmosfer maneələri kimi çətin şəraitdə belə tətbiqin təhlükəsizliyini artırıb.

Bir illik dəniz sınaqları başa çatdıqdan sonra demonstrator Bundesverin Silahlanma və Döyüş Sursatları üzrə Hərbi-Texniki Xidmətinin (WTD 91) Mep pendə yerləşən Lazer Kompetensiya Mərkəzinə təhvil verilib. Orada sistem yenidən istismara verilib və pilotsuz aparatlara qarşı yönəlmiş əlavə sınaqlar, o cümlədən yerüstü testlər aparılır.

"Rheinmetall" şirkətinin silahlanma və döyüş sursatları bölməsinin rəhbəri Roman Köhne bildirib ki, birgə müəssisənin yaradılması Almaniya daxilində sıx sənaye və texnoloji əməkdaşlığın üstünlüklərini nümayiş etdirir. Onun sözlərinə görə, səlahiyyətlərin dəqiq bölüşdürülməsi Bundesver üçün yetkin bir məhsulun nisbətən qısa müddətdə hazırlanmasına imkan verib.

O, tərəfdaşlığın əsas məqsədlərindən biri kimi texnologiyaların "milliləşdirilməsini” — yəni tədqiqat, istehsal və texniki xidmətin ölkə daxilində saxlanmasını — qeyd edib. Bu yanaşma iş yerlərinin qorunmasına, sənaye imkanlarının genişlənməsinə, eləcə də böhran vəziyyətlərində milli təhlükəsizliyin və müstəqilliyin gücləndirilməsinə xidmət etməlidir.

"MBDA Germany" şirkətinin baş direktoru Tomas Qotşild isə bildirib ki, yeni şirkət Almaniyada birbaşa yaradılan hərbi lazer silahlarının hazırlanması və istehsalı sahəsində yeni standartlar müəyyən etməlidir. O vurğulayıb ki, birgə müəssisə uzunmüddətli əməkdaşlığın nəticəsidir və sınaqdan çıxmış dəniz lazer sisteminin bazara tez bir zamanda çıxarılmasına yönəlib.

Şirkətlər qeyd edirlər ki, "Rheinmetall" və MBDA-nın ekspertizasının birləşdirilməsi Almaniya Hərbi Dəniz Qüvvələrinə texnoloji cəhətdən qabaqcıl, tam sertifikatlaşdırılmış və döyüş tətbiqinə hazır lazer sistemi təklif etməyə imkan verəcək. Bu sistem dəniz məkanında pilotsuz təhdidlərə qarşı əlavə müdafiə eşelonu rolunu oynayacaq.

Aydın