Avropa Komissiyasının keçmiş rəhbəri Jan-Klod Yunker Ukraynanın Aİ-yə daxil olması ilə bağlı erkən danışıqlara çağırışları şərh edərkən bildirib ki, Ukrayna "cəmiyyətin bütün səviyyələrində korrupsiyaya uğrayıb” və hələlik Aİ-yə daxil olmaq hüququ yoxdur.
Qaynarinfo xəbər verir ki, o, bu barədə "Augsburger Allgemeine” nəşrinə müsahibəsində
deyib.
"Ukraynada başdan-ayağa əziyyət çəkən insanlara yalan vədlər verməməliyik. Avropada ukraynalılara dərhal üzv ola biləcəklərini söyləyən bəzi şəxslərə çox qəzəblənirəm. Bu, nə Aİ, nə də Ukrayna üçün yaxşı olar”, - keçmiş məmur bildirib.
Onun sözlərinə görə, "Ukrayna ilə əlaqəsi olan hər kəs bilir ki, bu, cəmiyyətin bütün səviyyələrində korrupsiyaya uğramış bir ölkədir”.
"Bütün səylərinə baxmayaraq, o, qoşulmaq hüququna malik deyil və böyük daxili islahatlara ehtiyacı var", - Yunker qeyd edib.
Yunker, Aİ-nin "bəzi yeni üzvlərlə, məsələn, qanunun aliliyi ilə bağlı pis təcrübəsi olduğunu" və "bunun bir daha təkrarlana bilməyəcəyini" söyləyib.
Onun fikrincə, Moldova və Ukrayna üçün Avropa perspektivi qorunub saxlanılmalıdır, lakin bunu bir gecədə, bir düyməyə basmaqla əldə etmək ümidi ilə əlaqələndirilməməlidir.
Nizami Bağırov
